МБОУ "Тулунинская СОШ им. П.В. Аммосова" Усть-Алданский улус РС(Я)
Образование · 4 мая 2026 г.
🌟 Бүгүн улууспутугар Улуу Кыайыы 81 сылыгар аналлаах Кыайыы нэдиэлэтин тэрээһиннэрэ са... — 4 мая 2026 г. в 11:30:30.166
🌟 Бүгүн улууспутугар Улуу Кыайыы 81 сылыгар аналлаах Кыайыы нэдиэлэтин тэрээһиннэрэ саҕаланнылар. Биллэрин курдук муус устар 24 күнүттэн улууспутугар Саха сиринээҕи национальнай байыаннай оскуола Знамятын эстафетата саҕаламмыта. Ол элбэх оскуоланы кэрийэн бүгүн II Лөгөй нэһилиэгин дэлэгээссийэтэ Тулуна орто оскуолатын байыаннай-патриотическай кулуубун оҕолоро арыаллаах Мүрү 1№-дээх орто оскуолатыгар аҕалан туттардылар. Үөрүүлээх тэрээһини оскуола оҕолорун хора Россия, Саха сирин, Уус Алдан улууһун Өрөгөй ырыаларын толоруунан саҕалаата. Ол кэнниттэн сураҕырбыт “День Победы” өрө күүрүүлээх ырыаны ыллаан Улуу бырааһынньык тыынын иҥэрдилэр. Буоларын курдук Знамя эстафетатын, национальнай байыаннай оскуола историятын туһунан сиһилии кэпсэннэ, оҕолор сэҥээриилэрин ылла. Салгыы улуустааҕы түмэлгэ Саха сиринээҕи национальнай байыаннай оскуола 100 сылыгар аналлаах быыстапка аһылынна. Манна улуус бэтэрээннэрин Сэбиэтин бэрэссэдээтэлэ Иван Колодезников кыттан мустубут дьону Кыайыы нэдиэлэтэ саҕаламмытынан эҕэрдэлээтэ уонна байыаннай оскуола туһунан хаһыаты кытары кыттыгас бырайыагы билиһиннэрдэ. Онтон бу байыаннай оскуола историятынан анаан хасыһан үөрэтэн эрэр түмэл исписэлииһэ Айаал Бурцев быыстапка туһунан кэпсээтэ. Ол кэнниттэн кыраайы үөрэтээччи Федот Бысыин байыаннай знактар уонна уордьаннар, мэтээллэр тустарынан коллекциятын көрдөрүүгэ туруоран бэрт дириҥ ис хоһоонноох кэпсээнинэн сэҥээртэ. Кыайыы нэдиэлэтин бастакы күнүн тэрээһинэ Мындааба оскуолатыгар салҕанна. Манна бүгүҥҥүттэн 10-с кылаас уолаттарыгар биэс күннээх байыаннай үөрэх саҕаланна. Кинилэргэ байыаннай оскуола Знамятын эстафетата тиийдэ. Манна улуус баһылыгын солбуйааччы Григорий Аргунов, үөрэх управлениетын салайааччыта Федор Татаринов кыттан уолаттары байыаннай сулууспаҕа бэлэмнэнии бастакы хардыыларын оҥорон эрэллэринэн эҕэрдэлээтилэр. Федот Дмитриевич уолаттарга коллекциятын көрдөрөн, кэпсээн олус кэрэхсэттэ. Онон улууспутугар Кыайыы нэдиэлэтэ итинник саҕаланна, оттон байыаннай оскуола Знамятын эстафетата сарсын Сыырдаах уонна Бэйдиҥэ оскуолаларын таарыйан Чурапчыга илдьэн туттарыллыаҕа. ✍️ Афанасий Сектяев ✅ @uamurusahargata @ulusmedia