Улууспутугар биллэриллибит ырааһырдыы ыйдарын чэрчитинэн, бүгүн, муус устар 30 күнэ Мүр... — 30 апреля 2026 г. в 09:27:55.681
Улууспутугар биллэриллибит ырааһырдыы ыйдарын чэрчитинэн, бүгүн, муус устар 30 күнэ Мүрү нэһилиэгэр "Үлэ күнүнэн" биллэриллэн, Маай бырааһынньыгын көрсө маассабай субуотунньук тэрилиннэ. Субуотунньукка 34 тэрилтэттэн, уопсайа 500-тэн тахса киһи таҕыста. Субуотунньук саҕаланыытыгар үөрүүлээх миитин ыытылынна. Манна улуус баһылыгын солбуйааччыта Алексей Тарасов, Мүрү нэһилиэгин баһылыга Прокопий Румянцев уонна улуус тэрилтэлэрин идэлээх сойуустарын бэрэссэдээтэлэ Галина Аммосова маннык тэрээһиннээхтик, күргүөмүнэн тахсыбыттарыгар барҕа махталларын этэн туран үлэ бырааһынньыгынан эҕэрдэлэрин тиэртилэр, итиэннэ бастыҥ үлэлээх идэлээх сойуустар бэрэссэдээтэллэригэр махтал суруктарын туттардылар. Бу кэмҥэ күөх, ыраас халлааҥҥа үөр сэттэ туруйа үрдүлэринэн көтөн уруйдаан ааспыттарыттан дьон сүргэтэ көтөҕүллэн, үөрэ-көтө үлэҕэ туруннулар. Маннык түмсүүлээх тэрээһиннэр нэһилиэк дьонун биир сомоҕо буоларга, дойдуларын туһугар кыһалларга угуйаллар. Нэһилиэк уулуссалара, болуоссаттар, ытык сирдэрэ ырааһырдылар. Сотору кэминэн сайыҥҥы бастакы ардахтар түһэннэр бөһүөлэкпит күөҕүнэн чэлгийиэ. Улуус дьаһалтатын пресс-сулууспата.