Сааскы чаҕыл күлэр күн ырааһынан чаҕылыйан күннүүн кытта күлсэр күнүгэр үлэ бэтэрээнэ В... — 31 марта 2026 г. в 05:08:01.540
Сааскы чаҕыл күлэр күн ырааһынан чаҕылыйан күннүүн кытта күлсэр күнүгэр үлэ бэтэрээнэ Варвара Шадрина аатынан култуура үлэһиттэрин икки ардыларыгар "Ай- кынат'' көрүү күрэх, ыраахтан чугастан ыҥырыллан түһүлгэлээн түмүстүлэр, көөчөөн көрун- нарын көгүлүттэн туттулар. А. И Борисов аатынан култуура киинин үлэһиттэрин көҕүлээһининэн уонна тэрийиилэринэн, Саха Өрөспүүбүлүкэтин култууратын үлэтин туйгуна Варвара Шадрина аатынан көрүү күрэҕин төрөппүт уолаттара (оҕолоро ) анал бириис туруораннар ийэлэрин аатын уйэтиттилэр. Көрүү күрэх түөрт түһүмэхтээх. Алта култуура киинин үлэһиттэрэ Чкалов, Тиит- Арыы, 2 Дьөппөн, Нөмүгү, Уулаах Аан, Өктөмнөр бэлэмнэнэн кэлэн илин - кэлин түһүстүлэр, сатабылларын кэлбит көрөөччүлэргэ көрдөрөннөр ытыс тыаһынан доҕуһуоллаттылар. Варвара Григорьевна Төхтүр кулуубугар өр сылларга үлэлээн бэйэтин туспа суолун, ииһин көрөөччүлэргэ хаалларбыта. Ураты туспа буочардаах, тэрийэр үлэтин таһынан, сыанаҕа эрэ таҕыстар, хайа да оруолу толору арыйара, бэйэтин тула көрү көҕүлүттэн тутан, Көөчөөн көрө түмсүүнү тэрийэн үлэлээбитэ. Араас сценкалары туруоран сайынын фермаларга, ходуһаларынан агит биригээдэлэргэ сылдьаллара. Култуура түбүктээх үлэтин кытта нэһилиэк общественнай олоҕун ыкса сибээстээн үлэлиирэ, араас проблемалары холкутук быһаарсара, тэрийэрэ. 80- сылларга төрүт култуура үгэстэрин ыччакка тиэрдии үлэтин саҕалаабыта. Эбээлэри сиэннэрин кытта түмэн хомус куруһуогун үлэлэтэн, салгыы "Кэскил'' хомусчуттар бөлөхтөрүн оччотооҕу оскуола директорын Николай Шишигинныын тэрийбиттэрэ. Үйэлээх, ситими салҕыыр кэхтибэт үлэ хомусчуттар бөлөхтөрө номнуо 40 сылын хомус хомуһуннаах тойугун ыллатан, аан дайды аартыктарын арыйан саха илгэлээх тыын ыллатан кэллэ. Айар үлэ кэскиллээх, ыччат дьоно салгыыр айар тутар. Варвара Шадрина кыра уола Дмитрий Шадрин (Шандор) ийэтин суолун салгыы култуура идэтин талан, күн бүгүн айымньылаахтык үлэлии хамсыы сылдьар. Дьоро күн түһүлгэлээн түмсуутун түмүгунэн буоллулар: Бастакы миэстэни "Ырыа Миисэ'' аатынан Тиит Арыы култууратын киинин үлэһиттэрэ буолан уу харчыннан 50 тыһ солкуобай бириэмийэ туттулар. Иккис миэстэ Чкалов сэл култуура уонна успуот киинин үлэһиттэрэ анал "Көмүлүөк" Саха фирма иһит наборунан уонна үһүс миэстэҕэ иккис Жемконнар тиксэннэр үөрүүлэрин үрдэттилэр. Түмүккэ нэһилиэк общественнай түмсүүлэрэ тэрийбит итии чэйдээх баай талым астаах сандалы тула санаа атастаһан тарҕастылар. Ити күрдук айар тутар айылгылаах култуура үлэһиттэрэ кэрэни кэрэхсэтэ, үтүөнү үксэтэ саргыны салайсар аналлаах үлэлэрэ үрдүү туруохтун. Мотрена Ефремова култуура үлэтин бэтэрээнэ СО культуратын туйгуна.