Бэҕэһээ кулун тутар 7 күнүгэр Бөкчөҥөө нэһилиэгин «Арчы» сынньалаҥ Киинигэр «Ис сүрэхтэ... — 8 марта 2026 г. в 06:36:59.894
Бэҕэһээ кулун тутар 7 күнүгэр Бөкчөҥөө нэһилиэгин «Арчы» сынньалаҥ Киинигэр «Ис сүрэхтэн иһирэх иэйии» - диэн ааттаах олус сэргэх, чахчы иһирэх тэрээһин буолан ааста. Тэрээһин саҕаланыытыгар улуус бэтэрээннэрин сэбиэтин бэрэссэдээтэлин Федор Федорович Николаев уонна Бөкчөҥөө нэһилиэгин баһылыгын Альберт Иванович Прокопьев Эҕэрдэ суруктарын нэһилиэк олоҕор-дьаһаҕар кылааттарын киллэрсэ сылдьар Далбар Хотуттарга үөрүүлээх быһыыга-майгыга туттардылар. Бу тэрээһиҥҥэ Бөкчөҥөө нэһилиэгин кэрэ аҥардарын кытта Өкүндүттэн уонна Хампаттан ыалдьыттар кэлэннэр бырааһынньык өссө киэргэйдэ. Көрдөөх сыанкалары дьон хайгыы, сөҕө-махтайа көрдүлэр, ырыа-тойук ыраахха диэри дьиэйдэ, үҥкүү-битии да умнуллубата, оонньуу-көр оройуттан тутулунна. Тэрээһин саҕаланыаҕыттан бүтүөр диэри ыалдьыттар оонньуу бөҕөнү оонньоотулар. Оонньуулары кулууп үлэһиттэрэ Петр Калачев уонна Вячеслав Корнилов бэркэ толкуйдаан ыыталаатылар. «Арчы» сынньалаҥ Киинин үлэһит эр дьонноро тэрээһиннэргэ көхтөөхтүк кыттар кэрэ аҥардарга сибэкки дьөрбөтө туттаран долгутуулаах түгэни үөскэттилэр. Тэрийээччилэр ааттарыттан ыалыы сытар Хампа уонна Өкүндү сэлиэнньэлэриттэн кэлбит ыалдьыттарбытыгар махталбыт муҥура суох. Астаах остуоллар тула олорон маннык тэрээһиннэргэ кэлэн сэргэхсийэн барбыт дьоммутугар барыгытыгар чэгиэн туругу, дьолу-соргуну баҕарабыт! «Арчы» сынньалаҥ Киинин кэллэктиибэ