КҮҮКЭЙГЭ ААН ДОЙДУ МАС ТАРДЫҺЫЫТЫН ТҮМЭР СИРЭ (РЕЗИДЕНЦИЯТА) БААР БУОЛУОҔА 👍.
КҮҮКЭЙГЭ ААН ДОЙДУ МАС ТАРДЫҺЫЫТЫН ТҮМЭР СИРЭ (РЕЗИДЕНЦИЯТА) БААР БУОЛУОҔА 👍. Бүгүн күннээх Күүкэй күнүнэн көрсөн Саха сиригэр мас тардыһыытын федерацията тэриллибитэ 30 сылын бэлиэтээтибит. Бүтүн норуоттар икки ардыларынааҕы мас тардыһыытын федерациятын бэрэссэдээтэлэ Александр Акимов көҕүлээһининэн төрөөбүт дойдутугар үбүлүөйдээх сылы бэлиэтээн аан дойду мас тардыһыытын салайааччылара, ааттаах мадьынылара түмсэр сирдэрэ тутулла турарын көрөн сөхтүбүт, олуһун сэргээтибит. Санаан да көрөргө астык 👍. Үөрүүлээх тэрээһиҥҥэ Аан дойду мас тардыһыытын күрэһин кыайыылааҕа Наталья Кузнецова, ааттаах тириэньэрдэр Анатолий Петров, Владимир Архипов, Михаил Саввинов, Павел Павлов, улуус баһылыга Анатолий Григорьев, улуус федерациятын салайааччыта Гаврил Еремеев ытык-мааны ыалдьыт буолан өрөгөй түгэни суолталаатылар. Кураһаай Мэхээлэ мадьыныларга, мас тардыһыытын салайааччыларыгар алгыс тылын иҥэрэн саха айыы үҥкүүтүн өрө тутта. Үс былаах үөһэ күөрэйэн саха бастыҥ спордун көрүҥэ - мас тардыһыы Олимпиада чыпчаалыгар тиийэ сайдарыгар ыра санаа иһирэхтик иһилиннэ. Тэрээһин түмүгэр мас тардыһыы 30 сылын бэлиэтээн оскуола тулаһатыгар үс хатыҥ мас олордуллан бэлиэ түгэн туоһута буолла. Күннээх Күүкэй аны аан дойду мадьыныларын түмэр ытык сир буолла, баҕар бу манна тэриллиэхтээх кэскиллээх кэпсэтииттэн саҕыллан мас тардыһыы Олимпиада бастыҥ оонньуута буолуоҕа, оннук эрэ буоллун! Тускулаана ГОРОХОВА-КОБЕЛЬЯНОВА, балаҕан ыйын 1 күнэ, 2026 сыл.