МБУ «Сунтарский музейный комплекс им. С.А.Зверева – Кыыл Уола»
Лайфстайл · 9 мая 2026 г.
"СОНОР" этэрээт ситиһиитэ — 9 мая 2026 г. в 03:31:51.896
"СОНОР" этэрээт ситиһиитэ Ыам ыйа - Улуу Кыайыыны өрөгөйдүүр, сандал сааһы көрсөр күөх нуоҕай ньургуһун күн уотугар сөтүөлээн тымныыны тобулан дьөрбөтү көтөҕөр бэртээхэй күннэр үүнэр ыйдара. Аҕыс уон биир сыл аннараа өттүгэр Аҕа дойду Улуу сэриитигэр Советскай Сойуус, Саха өрөспүүбүлүкэтин бары норуотттарын кытта биһиги улууспут үлэһит, хоһуун эр бэртэрэ дойду көмүскэлигэр туруммуттара. Сунтаар улууһун тыһыынчанан ааҕыллар чулуу уолаттара Кыһыл Армия кэккэтигэр ыҥырыллан Москваны, Ленинграды, Сталинграды көмүскээһиҥҥэ кыттыбыттара. Уонтан тахса сыл аннараа өттүгэр Арассыыйа волонтёрдарын “Медведь” этэрээтэ төрүттэммитэ. Киэҥ Арассыыйа үрдүнэн “Медведь” көрдүүр волонтёрскай этэрээт ыҥырыы таһаарбытыгар, Сунтаар улууһуттан “Сонор” волонтёрскай көрдүүр этэрээт тэриллэн – Аҕа дойду сэриитигэр сураҕа суох сүппүт буойуттары, киэҥ туттар килбиэннээх дьоммут кырамталарын булууга, сиэрдээхтик Ийэ сиргэ харайыыга көмөлөһөр соруктаах тэриллибитэ. “Сонор” волонтёрскай көрдүүр этэрээт салайааччыта Сергей Серафимович Иванов. Быйыл 2026 сыл, муус устар 20 ыам ыйын 4 күннэригэр Сунтаартан "Сонор" этэрээт Новгородскай уобалас Старая Русса куоратыгар "Вахта памяти" Аҕа дойду сэриитэ буолан ааспыт сиригэр көрдүүр үлэҕэ кыттыыны ылла. Сир анныттан араас сэрии сэбэ, ол саҕанааҕы дьалхааннаах кэмнэри туоһулуур маллар көһүннүлэр. Ыам ыйын 4 күнүгэр дылы ойуурга балаакканан сытан үлэлээн бүтэн Старая Русса куоракка киирэн үтүөҕэ туһуламмыт тэрээһиннэргэ кыттыыны ыллыбыт. Ыам ыйын 5 күнэ. Старая Русса куоракка "Медведь" көрдүүр этэрээт 10 сыллаах үбүөлүөйүн бэлиэтиир тэрээһиҥҥэ кытыннылар. 10 сыллаах үлэ түмүгэр булбут малларын, элбэх саллаат уҥуоҕун көрдөөн булан харайбыттарын, уордьаннарын аймахтарыгар туттарбыттарын көрдөрдүлэр. Ыам ыйын 6 күнүгэр – көстүбүт хорсун, буойун саллааттар ааттарынан яблоня маһын олордуу сиэрэ-туома толорулунна. Былырыын 2025 сыллаахха саас көстүбүт Саха Сирин Өлүөхүмэ оройуонун 19 эрэ саастаах Борисов Илья Емельянович сэриилэһэ сылдьан сырдык тыына быстыбыт саллаат аатынан "Сонор" этэрээт яблоня маһын олорто, төрөөбүт сириттэн ийэ буорун аҕалан кутта. Ыам ыйын 7 күнүгэр күһүн көстүбүт саллааттар уҥуохтарын харайыы буолла, уопсайа 17 саллаат аата-суола биллэн братскай могилаҕа көмүлүннүлэр, уордьаннара кинилэр оҕолоругар, сиэннэригэр туттарылыннылар. Саха сирин бэрэстэбиитэллэрэ, Санкт-Петербург куоракка олорор биир дойдулаахтарбыт кэлэн кыттыыны ыллылар. Устьереки дэриэбинэҕэ Ильмень күөл кытыытыгар 19-с хайыһар биригээдэтигэр анаан оҥоһуллубут мемориальнай стендэҕэ эмиэ улахан тэрээһин буолан ааста. Старая Русса олохтоохторо саха саллааттара Ильмень күөлгэ сырдык тыыннара быстыбытын куруук өйдүү-саныы сылдьаллара киһини долгутар. "Сонор" этэрээккэ үлэлээтилэр: Салайааччылар: Сергей Серафимович Иванов, Николай Александрович Омуков. Оҕолор: Петров Эркин (СПТЛ-и 8 “б”), Сергеев Вадим (Гимназия 10 “б”), Колодезников Ньургун (Гимназия 10 “а”) үөрэнээччилэрэ. Сырдатыыны суруйда Николай Омуков