💐 СӨ үөрэҕириитин туйгуна, РФ уопсай орто үөрэхтээһинин бочуоттаах үлэһитэ, “РФ бастыҥ... — 25 августа 2026 г. в 05:02:21.172
💐 СӨ үөрэҕириитин туйгуна, РФ уопсай орто үөрэхтээһинин бочуоттаах үлэһитэ, “РФ бастыҥ учуутала” куонкурус кыайыылааҕа, РФ Президенин Гранын хаһаайката, РФ профсоюзтарын министиэристибэтин “Килбиэннээх үлэтин иһин” мэтээлинэн бэлиэтэммит Мүрү нэһилиэгин бочуоттаах олохтооҕо, В.С. Парников аатынан “Кэнчээри” эстетическэй киин эбии үөрэхтээһин педагога Екатерина Степановна Парникова 2019 сыллаахха Мүрү 1 №-дээх орто оскуолатыгар алын сүһүөххэ түөрт сыл устата үөрэппит оҕолоро быйыл орто оскуоланы ситиһиилээхтик бүтэрдилэр. Сэттэ сыл анараа өттүгэр 4-с кылааһы 21 оҕо бүтэрбититтэн 5 туйгун, 13 оҕо “5” уонна “4” сыаналарга үөрэнэн бүтэрбиттэрэ. Оҕо алын сүһүөх кылааска үөрэппит учууталыттан билиини, дьоҕуру, сатабылы иҥэринэр, орто уонна үрдүкү сүһүөх кылаастарга үөрэнэригэр олуга ууруллар. Екатерина Степановна 1989-2023 сылларга оскуолаҕа үлэлээбит кэмигэр барыта 10 кылааһы орто сүһүөххэ атаарбыта. 2019 сыллааҕы үөрэнээччилэрэ үөрэххэ үрдүк ситиһиилэнэн бастакы учууталларын үөртүлэр. Аурелия Рожина уонна Сайаана Протопопова Өрөспүүбүлүкэтээҕи лицей гуманитарнай уонна техническэй кылаастарыгар, оттон Арсен Николаев куорат 33 №-дээх оскуолатыгар үөрэммиттэрэ, оҕолор үһүөн туйгун үөрэхтэрин иһин кыһыл көмүс мэтээли ылары ситистилэр. Дайаана Артамонова, Виктория Егорова Мүрү 1 №-дээх орто оскуолатын үрүҥ көмүс мэтээллээх бүтэрдилэр. Бу оҕолор бары үрдүк үөрэх кыһатыгар үөрэниэхтэрэ. Аурелия Рожина Екатеринбург куоракка Ураллааҕы судаарыстыбаннай юридическай университекка “юриспруденция” идэҕэ, Сайаана Протопопова Улуу Бүөтүр аатынан Санкт-Петербургдааҕы политехническэй университекка тутааччы идэтигэр, Арсен Николаев ХИФУ ФТИ киирдилэр. Оттон үрүҥ көмүс мэтээллээх кыргыттар Дайаана Артамонова, Виктория Егорова ХИФУ тас дойдулар филологияларын уонна регионоведение институтугар кытай уонна кэриэй тылларын баһылыахтара. Алын сүһүөҕү бүтэрбит биир кылаастан 5 оҕо оскуоланы мэтээлинэн бүтэриитэ сэдэх түбэлтэ. Сиһилии суруналыыс Елена Сыроватская ⬇️ МЮРЮГАЗЕТА.РФ 📲 Мах-каналбытыгар сурут ⬇️ https://max.ru/channel_ua_murusahargata ✅ @uamurusahargata @ulusmedia