Үтүө санаа уйата: юннаттар станцияларыгар доҕордуу көрсүһүү — 17 июня 2026 г. в 23:03:51.470
Үтүө санаа уйата: юннаттар станцияларыгар доҕордуу көрсүһүү Бэс ыйын 17 күнүгэр биһиги юннатскай станциябытыгар ураты истиҥ, сылаас күн буолан ааста. Биһиэхэ чахчы даҕаны күндү ыалдьыттар — «Ааҕыы эйгэтэ» оҕо библиотекатын сайыҥҥы ааҕыы былаһааккатын иитиллээччилэрэ, дьиҥнээх доҕотторбут кэлэн бардылар. Биһиги ытыктыыр киһибит, библиотека сэбиэдиссэйэ Вера Алексеевна Портнягина үлэҺиттэрэ: Надежда уонна Варя салайааччылардаах. Бу күн биһиги «Доҕоргор көмөлөс» аахсыйа кыттыылаахтара буоллубут. 17 чаҕылхай оҕо санаата биһиэхэ сибиэһэй оҕуруот аһын уонна фрукта эрэ буолбакка, сайыҥҥы сылааһын бэлэх уунна. Кинилэр кыһамньыларын көрөн, төһөлөөх үөрдүбүт, долгуйдубут буолуой! Станциябыт аанын директорбыт Таисия Дмитриевна уонна ытыктыыр настаабынньыкпыт Алексей Алексеевич Винокуров бэрт эйэҕэстик арыйдылар. Оҕолор саамай тардыспыт сирдэринэн тыыннаах муннукпут буолла. Кыыллары имэрийэн, көтөрдөрү аһатан, черепахалары одуулаан, оҕолор харахтарыгар айылҕаҕа таптал уота умайара көстөрө. Биһиги сайыҥҥы үлэлэрбит сонуннарыттан үллэһиннибит, ыраас салгыҥҥа оонньоон-көрүлээн о5олор дуоһуйдулар. Маннык көрсүһүүлэр биэрэллэрэ элбэх: амарах, болҕомтолоох, эйэҕэс буоларга уонна доҕордоһуу күндүтүн сыаналыырга үөрэтэллэр. Ис сүрэхпититтэн күндү ыалдьыттарбытыгар — оҕолорго уонна кинилэр уйаҥ дууһалаах салайааччыларыгар барҕа махталбытын тиэрдэбит! Эһиги сайыҥҥыт эмиэ маннык сырдык, күннээх уонна туҺалаах буоллун!