2026 сыл - Арассыыйаҕа Норуоттар Сомоҕолоһууларын, — 7 июля 2026 г. в 01:46:41.099
2026 сыл - Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура Сыла, Хаҥалас Улууһугар Сомоҕолоһуу Уонна Айан-Тутан Тмсүүлээх Буолуу, 2-Дьөппөн Нэһилиэгэр ТУПСАРАН ОҤОРУУ сыллара биллэриллибиттэрэ. 🌿🌿🌿🌿🌿🌿🌿🌿🌿🌿🌿 «Төрүт сирим – Дьөппөнүм Куппун туппут биһигим, Дьолу тутар түһүлгэм Үүнэр – сайдар мин түөлбэм…» - Галина Иванова – Айтыына Уран 🌿🌿🌿🌿🌿🌿🌿🌿🌿🌿🌿 Өбүгэлэрбит самаан сайын салаллыытын тоҕус томторҕолоох тоҕой сэлэни анньан, чороон айаҕы чуоҕутан, кэриэн ымыйаны кэккэлэтэн, арыылаах кымыһынан арчылаан көрсөр, бар дьонугар маанылаах ыһыаҕын ыһар, түһүлгэни тэрийэн үтүө үгэстэрин тэнитэн, бэс ыйын 27 күнүгэр 2-Дьөппөн уйгу-быйаҥ ыһыаҕа тэрилиннэ! - Ыччаттардыын ыксалаһан, эмэннэрдиин эҥэрдэһэн, үрдүк үөрүү үктэллэнэн түһүлгэҕэ түмсэн Самыртай саҕаттан салҕаммыт, Дьоҕуудай кэмиттэн тэнийбит, 2-с Дьөппөн нэһилиэгин удьуор уустара, халыҥ аймахтара, нэһилиэк тумус туттар тутаах дьоно, туруу үлэһиттэрэ тоҕуоруһа муһуннулар! Саамал кымыс ыһыаҕар Саха дьоно ыҥырар, Уйгу быйаҥ ыһыаҕар Күөрдэм сирэ угуйар... Түптэ унаар күөх буруотугар ыраастанан, кытыан от күөх унаар буруотугар арчыланан, орто дойду маанылаабыт ытык көтөрө – кыталык барахсан ыраас, кэрэ куолаһа күөх халлаҥҥа эйээрдэ. Айыылартан көрдөһөн алгыс ылар түһүлгэбитин ыраастаан – Аар Айыы Итэҕэлин Алгысчыта – Тимофеева Тамара Тимофеевна алгыс сиэрин-туомун толордо. Эрэкэ-дьэрэкэ оҕолор ыһыах дьонун үөрүүгэ көҕүлээн, Аан Алхчын Хотун тойугун туойан, сиэр-туом ситтэ. Күөрдэмнээҕи норуот тыйаатыра "Айар аартыктаах култуура үтүөкэн дьоно» диэн театрализованнай дьүһүйүү көрдөрдө. Дьүһүйүү Күөрдэм нэһилиэгин култууратын сайдыытын хронологиятынан турда, кэлэктиип артыыстара, "Кынат" театральнай куруһуогун оҕолоро көхтөөх кыттыыны ыллылар. Көрө үөрэр күндү ыалдьыттарбытын, урааҥхайдыыр саха омук үтүө үгэһин тутуһан, үс саха испит уохтаах кымыһынан айах туттан күндүлээтилэр! «2-с Дьеппен нэһилиэгэ» ТСП баһылыга Петухова Ольга Аполлоновна нэһилиэгин дьонугар-сэргэтигэр, ыһыах бары ыалдьыттарыгар эҕэрдэ тылын анаата, махтал суруктары туттарда. Ону тэҥэ СӨ Ил Түмэн государственнай мунньаҕын депутата, Россия наукатын академиятын Сибиирдээҕи салаатын Дьокуускайдааҕы научнай киин салайааччытын сүбэһит Скрябин Тихон Николаевич биир дойдулаахтарын ытык ыһыаҕынан эҕэрдэлээн Ил Түмэн аатыттан грамоталары туттарда. Ити курдук, дьоһун-мааны туруу үлэһит дьоммутунан киэн туттабыт, инники күөҥҥэ илдьэ сылдьабыт. Уйгу-быйаҥ ыһыахпыт өрөгөйдөөх түһүлгэтигэр үмүөрүһэ хаамсан, тоҕуоруһа мустан оһуохайдыыр оонньууну оройуттан туттулар! Аҕа дойду Улуу сэриитин кыттыылааҕа, Албан аат уордьан кавалера, биир дойдулаахпыт Захаров Никита Ильич – Микииттэ үтүө аатынан 8-с төгүлүн ыытыллар Улахан Оһуохай көрүү-күрэх түһүлгэтэ төрүттэннэ. Бастыҥ оһуохайдьыт – Лариса Константинова Түһүлгэлээх оһуохайдьыт – Варвара Павлова Уран тыллаах оһуохайдьыт – Инна Захарова ону сэргэ Любовь Лебедева, Людмила Артамонова Кыһыл Үргүйэттэн көхтөөх кыттыыны ыллылар. Оҕолорго Тимур Ефимов, Дариана Свинобоева, Ильдар Крылов, Арылхан Лебедев, Күннэй Винокурова, Карина Захарова, Валя Лебедева кыттыннылар. Бу үтүө кэскиллээх эһиэхэйбит, үтүө түөрэхтэнэн, сылтан сыл түһүлгэтэ кэҥии туруоҕар баҕарабыт. Култуура сылыгар аналлаах киин ураһаҕа “Ситим” КК, Модельнай библиотека уонна Р.К.Захаров аат. “Самыртай” түмэлин ситиһиилэрин кэрэхсиир “Айар суол аартыгынан” быыстапка турда. Күнүскү омурҕан кэмигэр ытык ыһыах ыалдьыттарын, бар дьонун баай барыылаах байанай сааскы сыа-сым булдуттан КУС МИИНИНЭН күндүлээтилэр! Уруу, аймах – билэ дьон түмсэн, бэйэ-бэйэлэрин ыҥырсан түһүлгэнэн олорон ыьыах аһын үөрэ-көтө амсайдылар! Фольклор күрэҕэр Өркөн Скрябин, Милана Скрябина, Тургун Винокуров, Эдгар Никифоров кыттыыны ыллылар. “Ситим” КК методиһа СР культуратын туйгуна Майя Скрябина “Күн мичээрэ” оҕолорго үҥкүү түһүлгэтин көҕүлээн ыытта. Кыайыылааҕынан Айаал Устинов буолла.