«Майа аҕыс кылаастаах оскуолата» — 10 сентября 2026 г. в 10:33:39.085
«Майа аҕыс кылаастаах оскуолата» өйдөбүнньүк бэлиэни арыйыы Мэҥэ Хаҥалас улууһугар Майа сэлиэнньэтигэр «Майа аҕыс кылаастаах оскуолата» турбут миэстэтигэр өйдөбүнньүк бэлиэни үөрүүлээх быһыыга арыйдылар. История чахчылара кэпсииринэн, Майаҕа оройуон үөрэҕириитин тиһигин иһинэн 1962 сыллаахха Майа аҕыс кылаастаах оскуолата тэриллэн 1993 сыллаахха диэри үгүс ыччаты билиигэ-көрүүгэ үөрэппитэ. Араас сылларга 8 кылаастаах онтон Майа ситэтэ суох орто оскуолата, кэлин Майа иккис нүөмэрдээх орто оскуолата диэн ааттаммыта. Оскуолаҕа араас омук оҕолоро советскай интернационализм тыыныгар иитиллибиттэрэ. Уопсайа 10 тыһыынчаттан тахса үөрэнээччи үөрэх кыһатын бүтэрбитэ. Бэлиэ түгэҥҥэ оҕо-ыччат туһугар үлэлээн ааспыт, үөрэх-билии аартыгын арыйбыт оччотооҕу учууталлар, бэтэрээн педагогтар кыттыыны ылан үтүө тылынан ахтан-санаан аастылар. Өйдөбүнньүк бэлиэ Майа аҕыс кылаастаах оскуолатыгар омук тылын учууталынан уонна дириэктэри үөрэх чааһыгар солбуйааччынан үлэлээбит Дария Санникова көҕүлээһининэн оскуола турбут миэстэтигэр билигин Майатааҕы кииннэммит бибилэтиэкэ эбийиэгэр туруорулунна.