ТӨҤҮЛҮГЭ «УЧУУТАЛ УОННА ҮӨРЭНЭЭЧЧИ» ИСКИБИЭРЭ АРЫЛЫННА
ТӨҤҮЛҮГЭ «УЧУУТАЛ УОННА ҮӨРЭНЭЭЧЧИ» ИСКИБИЭРЭ АРЫЛЫННА Алтынньы 5 күнүгэр Төҥүлү нэһилиэгэр 2023 сыллаахха нэһилиэнньэ куоластааһынын түмүгүнэн «Тупсаҕай эйгэлээх куораты тэрийии» федеральнай бырагырааманан тутуллубут «Учуутал уонна үөрэнээччи» искибиэрин үөрүүлээх арыллыыта буолла. Бу искибиэр Төҥүлү нэһилиэгэр үөрэхтээһин тэриллибитэ 120 сылыгар ананар. “Учуутал уонна үөрэнээччи” искибиэрин сүрүн уратытынан урукку оскуола тыыныгар, дириҥ устуоруйатыгар олоҕуран оҥоһуллубута буолар. 2024 сыллаахха, “Тимир-строй” хааччахтаммыт эппиэтинэстээх уопсастыба тэрилтэтэ, олохтоох көҕүлээһиннэри өйүүр бырагырааманан урукку оскуола оннун ыраастаан, 2025 сылтан үлэ маҥнайгы түһүмэҕин ыыппыта. Онтон быйыл “ПИК” хааччахтаммыт эппиэтинэстээх уопсастыба тэрилтэтэ үлэни түмүктээтэ. Искибиэр үөрүүлээх арыллыытыгар Саха Өрөспүүбүлүкэтин Дархан этээччитэ Георгий Баишев алгыс сиэрин-туомун оҥордо. Үөрүүлээх тэрээһиҥҥэ “Төҥүлү нэһилиэгэ” тыа сирин түөлбэтин баһылыга Петр Эверстов, улуус баһылыгын инфраструктураҕа уонна ОДьКХ боппуруостарыгар солбуйааччы Василий Филиппов, СӨ архитектураҕа уонна градостроительствоҕа салалтатын сүрүннүүр исписэлииһэ, Төҥүлү нэһилиэгэр “Тупсаҕай эйгэлээх куораты тэрийии” федеральнай бырагыраама куратора Майя Стручкова, “ПИК” хааччахтаммыт эппиэтинэстээх уопсастыба дириэктэрэ Юрий Борисов, улуус үөрэҕин салаатын салайааччыта Ирина Плотникова, Төҥүлү орто оскуолатын дириэктэрэ Семен Десяткин, педагогическай үлэ бэтэрээнэ, “Учууталлар учууталлара” бэлиэ хаһаайката Варвара Яковлева кыттыыны ылан, эҕэрдэлэрин тиэртилэр. Хотун Төҥүлү сирэ өрүү чэчирии, сайда туруохтун! Мэҥэ Хаҥалас улууһун дьаһалтатын пресс-сулууспата