Балыктаах орто оскуолатыгар фермер кылааһа аһыллыытын туһунан сүбэ көрсүһүү буолла
Балыктаах орто оскуолатыгар фермер кылааһа аһыллыытын туһунан сүбэ көрсүһүү буолла Алтынньы 29 күнүгэр Михаил Габышев аатынан Балыктаах орто оскуолатыгар суолталаах көрсүһүү буолан ааста. Саха Өрөспүүбүлүкэтин Тыатын хаһаайыстыбатын миниистирин солбуйааччы Сахаяна Павлова салайааччылаах үлэлиир бөлөх, бу дьыл балаҕан ыйыгар өрөспүүбүлүкэҕэ бастакынан Балыктаах оскуолатыгар арыллыбыт фермер кылааһын үлэтин билсээри, учууталлары кытта көрсүһүү тэрийдилэр. Үлэлиир бөлөххө киирдилэр: • Саха Өрөспүүбүлүкэтин Тыатын хаһаайыстыбатын министиэристибэтин үлэһиттэрэ: Зарема Бочкарева, Елена Владимирова, Анастасия Гермогенова. • АГАТУ иһинэн үлэлиир, идэҕэ эбии үөрэхтээһин институттан Ньургуйаана Скрябина. • АГАТУ приемнай хамыыһыйатын үлэһитэ Мотрена Матаннанова. Саҥа арыллыбыт фермер кылааһын уратытык тэрийэргэ, тыа сирин эдэр хаһаайыннарын үөрэтэр-иитэр үлэҕэ көмөлөһөргө бэлэмнэрин биллэрдилэр. Сүрүн сорук быһыытынан, төрөппүттэргэ, үөрэнээччилэргэ «тыа хаһаайыстыбатынан дьарыгырар— бу бүгүн олус туһалаах, ытыктанар идэ» буоларын өйдөтүү барыахтааҕын бэлиэтээтилэр. Тыа хаһаайыстыбатын министиэристибэтин өттүттэн фермердэри өйүүр граннар, араас субсидиялар, куонкурустар, АГАТУ түөрт факультета, оҕолорго ыытыллар АГРОНТИ олимпиадалара, араас таһымнаах ааҕыылар тустарынан сиһилии билиһиннэрдилэр. Көрсүһүүгэ кыттыыны ыллылар: • Мэҥэ Хаҥалас улууһун үөрэҕириитин салалтатын начаалынньыгын солбуйааччы Эльмира Апросимова. • «Мэҥэ нэһилиэгэ» тыа сирин түөлбэтин дьаһалтатын баһылыга Ньургун Габышев. Бу көрсүһүү түмүгүнэн, Балыктаах оскуолата — «Мэҥэ нэһилиэгэ» — АГАТУ — Тыа хаһаайыстыбатын министиэристибэтэ бииргэ үлэлээһиҥҥэ сөбүлэҥ түһэрсэн, салгыы айымньылаах үлэ саҕаланарын туһунан алгыс тыллар этилиннилэр. Ыччаты сиргэ чугаһатар үлэ ситиһиилээх буолуо диэн эрэл тылларынан түмүктэннэ.