Кулун тутар 24 күнүгэр, Сунтаардааҕы анал коррекционнай оскуола спортивнай саалатыгар, ... — 25 марта 2026 г. в 12:43:28.717

Кулун тутар 24 күнүгэр, Сунтаардааҕы анал коррекционнай оскуола спортивнай саалатыгар, «ПЕРВЫЙ РЫВОК» диэн гиирэ спордугар региональнай аһаҕас турнир үрдүк таһымнаахтык буолан ааста. Бу тэрээһини оскуолабыт дириэктэрэ Игнатьева Анисия Семеновна ѳйѳѳн, 5 тѳгүлүн сыл ахсын ыытабыт. Кини бу курдук патриотическай иитиини күүһүрдэр үлэни мэлдьи үрдүктүк тутар уонна оскуола кэллэктиибин саҥа ситиһиилэргэ сирдиир. Быйылгы күрэхпит, республиканскай таһымнаах турнирдар хас да төгүллээх призера, Сунтаар улууһун гиирэ спордугар чөмпүйүөнэ, Анал байыаннай дьайыы (СВО) бэтэрээнэ, «Хорсун быһыы» уордьан кавалера, оскуолабыт выпускнига Лазарев Герасим Гаврильевич сырдык кэриэһигэр анаан үөрэнээччилэр икки ардыларыгар ыытылынна. Бүлүү бөлөх түбэтин гиирэҕэ күрэһэ – бу судургу күрэс буолбатаҕын, дьиҥнээх күүс-уох, дьулуур уонна тулуур бырааһынньыга буолбутун көрдөрдө. Бу тэрээһиҥҥэ: Үөһээ Бүлүүттэн, Ньурбаттан уонна Сунтаарбыт сириттэн 60 күүстээх-уохтаах эдэр спортсменнар мустан, бэйэлэрин кыахтарын көрдөрдүлэр. Күрэс сүрүн тосхолун, гиирэ спордун сайдыытыгар сүдү кылаатын киллэрбит, ааттаах-суоллаах спортсмен Афанасий Тимофеев уонна Герасим бииргэ тѳрѳѳбүт быраата Гаврил Лазарев оҥорбуттара. Кинилэр бу күрэһи ыытыыга сүрүн тэрийээччи быһыытынан, оҕолорго дьулууру иҥэрэр уонна спортка эрэли күүһүрдэр үтүө үлэни ыыттылар. Тэрээһин үрдүк таһымнаахтык ааһарыгар биһиги улууспут урбаанньыттара уонна тэрилтэлэрэ спонсор быһыытынан улахан өйөбүлү оҥордулар: Сунтаар нэһииэгин дьаһатата (баһылык Филиппов Э. Е.), улуустааҕы инбэлииттэр обществолара (салайааччы Максимова Н. И.), «Татыйыына" фирма, "Наталия", "Альфа, Бетта, Гамма" уонна "Маяк" маҕаһыыннар. Маны таһынан, анал бириистэри Герасим Лазаревтыын бииргэ күрэстэспит доҕотторо уонна кинини эрчийбит тренердэрэ, Бордонтон Герасим ыкса билсэ сылдьыбыт ыаллара Саввиновтар уонна Териясовтар бэйэлэрин баҕа өттүнэн оҥорон, күрэс кыттыылаахтарыгар улахан сүргэни көтөхтүлэр. Герасим Лазарев сырдык аата маннык спортивнай тэрээһиннэр нөҥүө үйэ-саас тухары умнуллубат, эдэр көлүөнэ оҕолорго мэлдьи холобур буолуоҕа. Кини хорсун быһыыта, тулуурдаах майгыта эдэр оҕолор чэгиэн-чэбдик, дойдуларын таптыыр дьоһуннаах киһи буолан улааталларыгар улахан олук буолуо. Спордунан дьарыктаныҥ, чөл олохтоох буолуҥ!