МКУ «Департамент культуры и молодежной политики» МР «Нюрбинский район» РС(Я)
Новости · 5 июня 2026 г.
_*«Чэчириир күөх Ньурба" Экология Киинэ арылынна!*_ — 5 июня 2026 г. в 05:30:00.405
_*«Чэчириир күөх Ньурба" Экология Киинэ арылынна!*_ _Аан дойдутааҕы тулалыыр эйгэ күнүнэн уонна эколог күнүгэр түбэһиннэрэн бүгүн, Ньурба оройуонугар "Чэчириир Күөх Ньурба" экология киинэ Ньурба оройуонун култуураҕа уонна ыччат бэлиитикэтин департаменын иһинэн арылынна._ Бу Киин үлэтэ улууспут олохтоохторун түмэн, тулалыыр эйгэни, айылҕаны, иитэн-аһатан олорор сирбитин-уоппутун харыстыырга, үүнэр көлүөнэни онно уһуйарга, баайы-дуолу толору тириэрдэргэ туһуланыаҕа. Тэрээһин аанын Аар Айыы итэҕэлин 11-с кэрдиистээх Алгысчыта, ЮНЕСКО иһинэн үлэлиир норуоттар медициналарын магистра, Ньурба оройуонун уонна Таркаайы, Акана нэһилиэктэрин Бочуоттаах олохтооҕо *Алиса Михайловна Иннокентьева* Айыылартан көҥүл ылан, Алгыһынан арыйда. Ньурба оройуонун баһылыгын бастакы солбуйааччыта *Василий Николаевич Семенов*, Ньурба оройуонун култуураҕа уонна ыччат бэлиитикэтин департаменын салайааччыта *Розалия Михайловна Тихонова*, Ньурба оройуонун судаарыстыбаннай экологическай кэтэбил кэмитиэтин үрдүкү судаарыстыбаннай инспиэктэрэ *Виталий Валерьянович Духов*, Ньурбатааҕы ойуур харыстабылын судаарыстыбаннай казеннай салалтатын салайааччыта *Артем Павлович Семенов* бу Киини бииргэ үлэлэтэр туһунан *Сөбүлэҥ* баттастылар, аалай лиэнтэ быстылар, истиҥ эҕэрдэлэрин эттилэр. Быйыл уһулуччулаах салайааччы, бөдөҥ судаарыстыбаннай уонна бэлиитичэскэй диэйэтэл *Степан Васильевич Васильев* төрөөбүтэ *130* сылыгар анаан, Ньурба куоратыгар *130 маһы* Экология Киинэ олордорун биллэрдэ, хамсааһыны Олоҥхо дьиэтин тэлгэһэтигэр мас олордууттан саҕалаата. Тэрээһиҥҥэ үүнэр көлүөнэ, олохпут суолталара оҕолорбут - *Ньурбатааҕы техническэй лицейтэн "Юный эколог" лааҕыр* оҕолоро, *араас оскуолалартан уонна Ньурба техникумуттан волонтердар*, Ньурба куорат *3 нүөмэрдээх алын сүһүөх оскуолатын 1 "а" экологическай кылааһын үөрэнээччилэрэ* көхтөөхтүк кыттан, кырачаан экологтар ырыа бэлэхтээн киэргэттилэр. _Саҥа арыллыбыт Киин 2030 сылга диэри былаана үгүс, онон, таһаарыылаах уонна үтүө түмүктэрдээх үлэни баҕарабыт!_ _*Ньурба оройуонун култуураҕа уонна ыччат бэлиитикэтигэр департамена*_