МКУ «Департамент культуры и молодежной политики» МР «Нюрбинский район» РС(Я)
Новости · 1 июня 2026 г.
_*СӨ култууратын үтүөлээх үлэһитэ, СӨ Аар Дархан этээччитэ, Ньурба оройуонун култуураҕа... — 1 июня 2026 г. в 10:34:11.036
_*СӨ култууратын үтүөлээх үлэһитэ, СӨ Аар Дархан этээччитэ, Ньурба оройуонун култуураҕа уонна ыччат бэлиитикэтигэр департаменын салайааччыта Розалия Тихонова "Иэйии кынатынан дайа көтүөм" айар түһүлгэтэ төрүттэннэ.*_ _Ыам ыйын 30 күнүгэр Н.И. Харитонов-Николай Чуор аатынан «Кыталык» култуура дыбарыаһыгар Ньурба оройуонун култуураҕа уонна ыччат бэлиитикэтигэр Департаменын салайааччыта, СӨ култууратын үтүөлээх үлэһитэ, СӨ Аар Дархан этээччитэ, Ньурба куорат, Ньурба оройуонун Бочуоттаах олохтооҕо *Розалия Михайловна Тихонова* үбүлүөйдээх “Иэйии кынатынан дайа көтүөм” айар түһүлгэтэ дьону-сэргэни тоҕуорута муста._ _Дьоллоох дьоро күн ыалдьыттара ыраахтан-чугастан анаан-минээн айаннаан кэлэн кыттыыны ыллылар, истиҥ-иһирэх эҕэрдэлэрин анаатылар, алгыстаах санааларын көтүттүлэр. Ол курдук, ытык-мааны ыалдьыттарбыт, Розалия Михайловна дьүөгэлэрэ, доҕотторо, үлэ үөһүгэр чугастык алтыһар биир идэлээхтэрэ Арктикатааҕы судаарыстыбаннай култуура уонна ускуустуба университетын ректора *Саргылана Игнатьева*, Арктикатааҕы судаарыстыбаннай култуура уонна ускуустуба университетын доцена *Евдокия Сергина*, "Күн дьоно" фольклор бөлөҕүн салайааччыта *Евдокия Кондратьева*, Үөһээ Бүлүү улууһун култууратын салалтатын салайааччы *Сахаайта Мойтохонова*, Сунтаар улууһун култууратын салалтатын салайааччы *Саргылана Омукова кэргэнэ Николай Омуковтыын*, Сунтаар улууһуттан СӨ Дархан этээччитэ *Светлана Зедгенидзева*, Уус Алдан улууһуттан *Валентина Михайлова*, Үүнэр көлүөнэ тыйаатырын режиссера *Александр Титигиров*, Дьокуускай куораттан, Мииринэйтэн, Үөһээ Бүлүүттэн, Сунтаартан, Уус Алдантан, Зырянкаттан тиийэн-тиксэн кэлэн, айар түһүлгэни дабаттылар, үөрүүнү үллэстэн дьоллоотулар._ _Айымньылаах түһүлгэ киэҥ Ньурба киэн туттар, бастыҥ сиэринэн - Кымыс иһиитин сиэрин-туомун толоруунан саҕаланна. Быйаҥнаах дьыл тосхойорун туһугар, үүт сөлөгөй үрүлүйдэ, алгыстаах алаадьынан айах тутан арылынна._ _Дьоһун, үөрүүлээх түгэн тосхойон, бу күн *Розалия Михайловна Тихоноваҕа "Сүлэ нэһилиэгэ" тыа сирин түөлбэтин Бочуоттаах олохтооҕо* үрдүк ааты баһылык *Дмитрий Юрьевич Иванов* дохсун ытыс тыаһынан үрдүк сыанаҕа туттарда!_ _Айар киэһэни *Розалия Михайловна* бэйэтэ эрэ буолбакка, төрүттээбит "Ньурбачаан" фольклор кэлэктиибин маҥнайгы хараҥаччылара, бииргэ ыллаабыт-туойбут доҕотторо, айар бөлөхтөр, дьиэ кэргэнэ, биир идэлээхтэрэ уонна киэҥ Ньурба кэнчээритэ, талба талааннаах ыччата кыттыылаах ааста. Эгэлгэ эҕэрдэ этилиннэ, Алгыс баһа сыаланна! Дьоллоох дьоро күнү Ытык Ньурба оһуордаах оһуокайын түһүлгэтэ түмүктээтэ._ _*Күндү Розалия Михайловна!*_ _Өрүү бу курдук бэйэҥ тула дьону-сэргэни тоҕуорута мунньан, ылбаҕай ырыа хонуутугар таалалаан, оонньуулардаах оһуокайга ойон-тэбэн, үтүө-мааны үҥкүүлэри үмүөрүтэн, төрөөбүт Ньурбаҥ култуурата сайдыытын салайса, тэрийсэ, оҥорсо сырыт! Чөл-чэгиэн буол!_ _*Ньурба оройуонун култуураҕа уонна ыччат бэлиитикэтигэр департамена*_