🔰🔰🔰Бүгүн, бэс ыйын 16 күнүгэр "Майа сэлиэнньэтэ" тыа сирин түөлбэтин олохтоох дьаһал... — 16 июня 2026 г. в 08:07:00.584
🔰🔰🔰Бүгүн, бэс ыйын 16 күнүгэр "Майа сэлиэнньэтэ" тыа сирин түөлбэтин олохтоох дьаһалтатыгар «Оонньоммотох оҕо саас» үһүс кинигэ сүрэхтэниитэ сылаас, истиҥ эйгэҕэ буолан ааста. Кинигэ сүрэхтэниитин СӨ үөрэҕириитин туйгуна, "Учууталлар учууталлара", Дьабыыл нэһилиэгин Бочуоттаах гражданина Татьяна Ивановна Артемьева иилээн-саҕалаан ыытта. Тэрээһиҥҥэ Майа олохтоохторо, ытыктабыллаах ыалдьыттар, сэрии сылын оҕолоро, кинигэни сэҥээрэр ааҕааччылар кыттыыны ыллылар. Кинигэ Улуу Кыайыы 80 сылын көрсө бэлэмнэнэн, 2025 сыллаахха «Дани-Алмас» хампаанньаҕа 50 ахсаанынан бэчээттэнэн таҕыста, аҕааччы киэҥ араҥатыгар ананна. Кинигэ үһүс таһаарыытыгар 1928-1945 сылларга төрөөбүт, Майа сэлиэнньэтигэр уһун сылларга олорон, үлэлээн ааспыт сэрии сылын оҕолорун 97 ахтыылара түмүллэн киирдилэр. Ахтыыларга сэрии ыар сылларыгар оонньоммотох оҕо саас, тулаайах хаалыы аһыыта, күүстээх үлэттэн толлубат буолуу уонна Улуу Кыайыы үөрүүтэ толору арыллар. Кинигэ тас өттүгэр Ф.Г. Охлопков аатынан Майа орто оскуолатын үөрэнээччитэ Айыына Пахомова 5-с кылааска үөрэнэ сылдьан уруһуйдаабыт уруһуйа туһаныллыбыт. Уруһуй Ким Ильич Скрябин ахтыытыгар олоҕуран Намнааҕы педагогическай колледж устудьуона Артур Петрович Скрябин көмөтүнэн оҥоһуллубут. Эрэдэксийэлээн таһаарыыга Мария Дмитриевна Лукина, Мария Егоровна Сергеева, Татьяна Ивановна Артемьева үлэлэстилэр. Техническэй эрэдээктэр — Марфа Ивановна Птицына. Киирии тылы "Майа сэлиэнньэтэ" тыа сирин түөлбэтин баһылыга Алексей Иннокентьевич Неустроев, СӨ култууратын үтүөлээх үлэһитэ Мария Дмитриевна Лукина уонна СӨ үөрэҕириитин туйгуна Татьяна Ивановна Артемьева суруйдулар. Олохтоох дьаһалта үбүлээһининэн, өйөбүлүнэн Майаҕа үлэлээбит, Майа сайдарыгар бэйэлэрин сүдү кылааттарын киллэрсибит, оҕо-уруу тэниппит үтүө-мааны дьон ааттара үйэтитилиннэ, норуот устуоруйатыгар дириҥ махтал уонна ытыктабыл бигэтик бигэргэннэ, үйэлээх бэлэх оҥоһулунна. "Оонньоммотох оҕо саас" кинигэ кэлэр көлүөнэни норуотун, дойдутун сыаналыырга, ытыктыырга үөрэтэр, тыылга уонна фроҥҥа сылдьыбыт дьон тулуурдара, кытаанах санаалара олох кыһалҕаларын эрдээхтик туоруурга холобур буолар, эйэлээх олоҕу харыстыырга сирдиир, патриотическай өйү-санааны иитэр, төрөөбүт дойдунан киэн туттарга, үлэни өрө тутарга уонна көлүөнэлэр ситимнэрин бөҕөргөтөр иитэр-үөрэтэр суолтата улахан. Тэрээһин биир дойдулаахпыт Степан Тимофеев тылларыгар, Георгий Никифоров матыыбыгар "Эйэ, дьол иһин" ырыанан түмүктэннэ.