🔰🔰🔰И.М. Сосин аатынан оройуоннааҕы киин бибилэтиэкэҕэ Экология киинэ арылынна — 3 августа 2026 г. в 07:12:39.957
🔰🔰🔰И.М. Сосин аатынан оройуоннааҕы киин бибилэтиэкэҕэ Экология киинэ арылынна 🌿Мэҥэ Хаҥалас улууһугар дьоһун суолталаах түгэн буолла - Иннокентий Михайлович Сосин аатынан оройуоннааҕы киин бибилэтиэкэ иһинэн Экология киинэ арылынна. Бу тэрээһин Саха Өрөспүүбүлүкэтин Ил Дарханын 2018 сыллааҕы ыйааҕар уонна СӨ Экологияҕа министиэристибэтин ыытар үлэтигэр сөп түбэһиннэрэн, нэһилиэнньэҕэ экология култууратын үрдэтиигэ туһуланар. 🌿Киин сүрүн соругунан айылҕаҕа харыстабыллаах сыһыаны төрүттээһин, экологическай сырдатыыны күүһүрдүү уонна биир дойдулаахпыт, поэт, прозаик, эколог суруйааччы Иннокентий Сосин утумнаах үлэтин салгыы сайыннарыы буолар. Кини айымньылара төрөөбүт дойдуга тапталы, айылҕаҕа сүгүрүйүүнү кытта быһаччы ситимнээхтэр. 🌿Тэрээһин сахалыы сиэринэн-туомунан саҕаланна. Аал уоту оттон Айыыларга сүгүрүйэн Спиридон Григорьев – Илгэлээх Испирдиэн алгыстаата. Алгыс кэнниттэн мустубут дьону эҕэрдэлээтилэр: - Мэҥэ Хаҥалас улууһун баһылыгын нэһилиэнньэ олоҕун-дьаһаҕын хааччыйыыга солбуйааччыта Николай Лукич Никифоров. - «Майа сэлиэнньэтэ» тыа сирин түөлбэтин баһылыга Алексей Иннокентьевич Неустроев. - Мэҥэ Хаҥаластааҕы кииннэммит бибилэтиэкэ ситимин дириэктэрэ Марианна Афанасьевна Никанорова. - Суударыстыба экологияҕа кэтэбилин Мэҥэ Хаҥаластааҕы инспекциятын салайааччыта Федор Гаврильевич Охлопков. 🌿Киин арыллыбыт бэлиэ күнүгэр, Мэҥэ Хаҥаластааҕы экология инспекцията көҕүлээһининэн, саамай күүтүүлээх булт көрүҥнэригэр — туйахтаах кыылларга уонна тыатааҕыга лиссиэнсийэни үллэриигэ аналлаах жеребьевка буолан ааста. 🌿Саҥа арыллыбыт Экологическай киин инники былаана киэҥ, манна айылҕа харыстабылын туһунан лиэксийэлэр, маастар-кылаастар, оскуола оҕолоругар уонна улахан дьоҥҥо аналлаах араас көрсүһүүлэр ыытыллыахтара. 🌿Экология киинэ арыллыбытынан бар дьоммутун айылҕа харыстабылын тула бииргэ үлэлииргэ ыҥырабыт!