Мэҥэ Хаҥалас Майатыгар И.М. Сосин аатынан улуустааҕы киин бибилэтиэкэҕэ сылдьан, үлэни-... — 7 августа 2026 г. в 14:23:20.596
Мэҥэ Хаҥалас Майатыгар И.М. Сосин аатынан улуустааҕы киин бибилэтиэкэҕэ сылдьан, үлэни-хамнаһы көрдүм. Улуус үрдүнэн 31 бибилэтиэкэлээх, 67 үлэһиттээх өрөспүүбүлүкэҕэ биир бөдөҥ бибилэтиэкэ ситимэ аҕааччыны сонурҕатар хас да бырайыагы үлэлэтэр эбит. Ол курдук, «Книга на сцене» диэн бырайыак ааҕааччыга кинигэни тиэрдиигэ биир кэскиллээх эбит диэн сэргээтим. Артыыстар бары – бибилэтиэкэрдэр. Репертуардара: Робер Тома «Аҕыс дьахтар амарах таптала» («Восемь любящих женщин») (2018), Тимофей Сметанин 100 сааһыгар «Атын киһи оҕото» (2019), И. Сосин 95 сааһыгар музыкальнай испэктээк «Биир сайын Суолаҕа» (2023) уо.д.а. Өссө биир дьоһун бырайыактара - «Алаас чэйэ» – бибилэтиэкэрдэр бэйэлэрэ моонньоҕон сэбирдэҕин, дөлүһүөнү, мятаны хомуйан, хатардан, хоруопкалаан, хас биирдии чэй бакыатыгар И. Сосин 12 араас кинигэтин QR куодунан ааҕар гына тупсаҕайдык толкуйдаабыттар. Быйыл улуус нэһилиэнньэтин барытын хабан билиини-көрүүнү тургутар «ААҔЫҤ» диэн сонун бырайыак оҥорбуттар. Түмүк оонньуу Бүтүн Арассыыйатааҕы бибилэтиэкэ күнүгэр, култуура сылыгар анаммыт, сүүмэрдиир оонньуу түмүгүнэн кыайыылаах тахсыбыт 4 бастыҥ хамаандалар күөн көрсөн, кыайыылааҕынан Мэҥэ нэһилиэгиттэн «Ситим» хамаандата тахсан, оройуон дьаһалтата үбүлээн туруорбут анал подставкалаах смарт телевизорынан наҕараадаланан, нэһилиэгин бибилэтиэкэтин материальнай техническай базатын хаҥаппыт. Салайааччы кэлэктиибин түмэр, үлэни көҕүлүүр сиригэр үлэ-хамнас ситиһиилээх буолар. Мэҥэ Хаҥалас улууһугар бибилэтиэкэ ситимин дириэктэрэ Марианна Никанорова бу бырайыактар ааптардара буолара киһини үөрдэр. Маны таһынан, улуус киин бибилэтиэкэтэ кинигэ таһаарыытыгар күүскэ үлэлэһэр эбит. Ол курдук кэккэ сылларга сахаттан бастакы ССРС норуодунай артыыһа Василий Местниковка, улууһу салайбыт Г.М. Артемьевка кинигэ тахсарыгар быһаччы үлэлэспиттэр. Ордук суолталаах үлэлэринэн Улуу Кыайыы 80 сылыгар анаммыт 34 туомнаах «Мэҥэ Хаҥалас Аҕа Дойду Улуу сэриитин сылларыгар» диэн монументальнай үлэни ааҕаллар. Бу бырайыагы Мэҥэ Хаҥалас улууһун баһылыга Дмитрий Тихонов көҕүлээн, улуус бары бибилэтиэкэрдэрэ кыттан, СӨ, улуус архыыптарыгар үлэлээбиттэрин түмүгэр 372 урут ааттара ааттамматах буойун баара биллибитэ. Бу улахан үлэ 2025 сыллаахха XIII Бүтүн Арассыыйатааҕы бастыҥ кинигэлэр күрэхтэригэр I миэстэни ылбыт. Билигин бибилэтиэкэ үлэһиттэрэ «Мэҥэ Хаҥалас дьоһун дьоно» кинигэ 2-с таһаарыытыгар үлэлии сылдьаллар, ону таһынан улууска элбэх сайдыыны аҕалбыт, бастакы таас тутуулары дьэндэппит «Сельхозтехника» улуустааҕы холбоһук тэрилтэтин туһунан 3 туомнаах кинигэҕэ үлэлэһэллэр. Бу курдук сэргэхтик үлэлии олорор Майа киин бибилэтиэкэтигэр ситиһиилэри баҕарабын! Афанасий Ноев