Сунтаар улууһун дьаһалтатын, улуус депутаттарын Сэбиэтин уонна тус бэйэбит ааппытыттан ...
Сунтаар улууһун дьаһалтатын, улуус депутаттарын Сэбиэтин уонна тус бэйэбит ааппытыттан биллиилээх поэтесса, очеркист, Саха Өрөспүүбүлүкэтин суруйааччыларын союһун, Суруйааччылар сойуустарын норуоттар икки ардыларынааҕы уопсастыбаларын, Суруналыыстар Арассыыйатааҕы сойуустарын чилиэннэрэ, Сунтаар сирин хомоҕой тыллаах хоһоонньута Александра Михайловна Григорьева-Сандаарыйа бу дьыл сэтинньи 5 күнүгэр орто дойдуттан күрэммитин туһунан дириҥник курутуйан туран биллэрэбит. Александра Михайловна балаҕан ыйын 8 күнүгэр 1955 сыллаахха Сунтаар оройуонун Элгээйи сэлиэнньэтигэр төрөөбүтэ. Орто оскуоланы 1972 сылга, Дьокуускайдааҕы госуниверситет ИФФ саха тылын отделениетын 1982 сылга бүтэртээбитэ. Хоһоону оскуолаҕа үөрэнэ сылдьыаҕыттан суруйар этэ. “Бэлэм буол” хаһыакка 1965 сылтан юнкор этэ. Кэлин “Ильич уоттара”, “Эдэр коммунист”, “Кыым” хаһыаттарга, “Хотугу сулус” сурунаалга элбэхтик бэчээттэммитэ. Бастакы кинигэтэ “Күнүм уота” (“Мое солнце”) 1997 сыллаахха тахсыбыта. Онтон ыла хоһоон, очерк сборниктара, методическай брошюралар, биллэр биир дойдулаахтарбыт туһунан элбэх кинигэлэрэ тахсыбыттара. Кини айымньыларыгар саха норуотун олоҕо, үгэстэрэ, куруук үтүөҕэ, кэрэҕэ тардыһар санаа, Ийэ дойдуга таптал, киһиэхэ ытыктабыл, олоххо дьулуур күүскэ этиллэрэ. Айар үлэтэ үрдүк сыанабылы ылан Александра Михайловна Суруйааччылар сойуустарын үрдүк наҕараадатынан – В.В. Никифоров-Күлүмнүүр, Саха сирин норуодунай бэйиэтэ П.Н. Тобуруокап бэлиэлэринэн, Ил Түмэн грамотатынан, Сунтаар улууһун култууратын сайдыытыгар кылаатын иһин Бочуот бэлиэтинэн наҕараадаламмыта. Александра Михайловна педагог быһыытынан Элгээйи, Сунтаар, Хоро, СПТЛ-И, Боронук оскуолаларыгар, Дьокуускайдааҕы Саха-гимназияҕа, Мирнэйдээҕи МПТИ филиалыгар эмиэ таһаарыылаахтык үлэлээбитэ. Ол туоһутунан республиканскай эбии үөрэхтээһин “Сердце отдаю детям” күрэһэр Лауреат аатын ылбыта, СӨ норуотун үөрэҕириитин туйгуна, “Признание” Саха-гуманитарнай гимназия, “Знание” общество “За заслуги” знактарын хаһаайката, Элгээйи нэһилиэгин бочуоттаах олохтооҕо буолара туоһулууллар. Күндүтүк саныыр, ытыктыыр, талба талааннаах биир дойдулаахпыт Александра Михайловна сырдык мөссүөнэ, айан таһаарбыт хоһоонноро, ырыаларын тыллара биһиги сүрэхпитигэр өрүү тыыннаах хаалыахтара. Кини айымньылара инникитин даҕаны кэнэҕэски ыччаты кэрэҕэ сирдии, угуйа туруохтара диэн эрэнэбит. Бу курус түгэҥҥэ А.М. Григорьева-Сандаарыйа чугас дьонугар, аймахтарыгар, доҕотторугар уонна ааҕааччыларыгар дириҥ кутурҕаммытын тиэрдэбит. Сунтаар улууһун баһылыга А.В.Григорьев Улуус депутаттарын Сэбиэтин бэрэссэдээтэлэ У.Д.Попова
Канал в каталоге Максиметера
620 подписчиков · Госорганы и учреждения