Улуус оскуолаларын уонна оҕо уһуйааннарын саҥа 2026–2027 үөрэх дьылыгар бэлэмнэрин бэрэ... — 25 августа 2026 г. в 05:21:15.840
Улуус оскуолаларын уонна оҕо уһуйааннарын саҥа 2026–2027 үөрэх дьылыгар бэлэмнэрин бэрэбиэркэтэ ыытылынна. Бу — хас сыл аайы ыытыллар, олус суолталаах тэрээһин буолар. Бэрэбиэркэ хамыыһыйатыгар үөрэх управлениетын бэрэстэбиитэллэрэ, баһаарнай кэтэбил (МЧС Госпожнадзор), Росгвардия уонна Ис дьыала уорганнарын исписэлиистэрэ үлэлээтилэр. Хамыыһыйа сүрүн болҕомтону туохха уурда? ✅ Баһаартан куттала суох буолууга: сигнализация систиэмэтин үлэтин, уот ситимин туругун, огнетушительлар болдьохторун уонна эвакуацияланар ааннары бэрэбиэркэлээтилэр. ✅ Антитеррористическай көмүскэлгэ: территорияны күрүөлээһини, харабыл үлэтин, видеокамералар уонна куолаһынан биллэрэр ситим төһө эппиэттииллэрин көрдүлэр. ✅ Санитарнай турукка: кылаастар сырдыктарын, салгылатар ситим үлэтин, остолобуой ас буһарар тэриллэрин, уу ситимин уонна туалеттар санитарнай нуормаларга сөп түбэһиилэрин. ✅ Ититии ситимэ кыһыҥҥы тымныыларга бэлэмигэр, өрөмүөн хаачыстыбатыгар. «Сыллата ыытыллар бу бэрэбиэркэ формальность буолбатах, сайыҥҥы сынньалаҥ кэнниттэн бары систиэмэлэрбит хайдах үлэлииллэрин сыаналыыр түгэн. Үөрэх кыһалара сайын өрөмүөн уонна бары ирдэбиллэри толорорго бэлэмнэнии үлэтин ыыттылар. Онон бастакы чуораан тыаһыар диэри сорох кыра итэҕэстэри туораттахпытына, оҕолорбутун чиҥ бэлэмнээх, куттала суох, ыраас уонна сылаас оскуолалар күүтэллэр», — диэн үөрэх управлениетын начальнигын солбуйааччы А.П. Максимов санааты үллэһиннэ. Хас биирдии үөрэх тэрилтэтин көрөн-истэн баран, хамыыһыйа «Бэлэм буолуу туһунан Акт» толордо. Оскуолалар, детсадтар саҥа үөрэх дьылын көрсөргө бэлэмнэрин бигэргэттэ!