«Үс кэрэ — үс ситим»
«Үс кэрэ — үс ситим» Алтынньы 9 күнүгэр, И.Н. Винокуров аатынан «Айылгы» норуот айымньытын дьиэтигэр, Саха өрөспүүбүлүкэтигэр Ийэ, Аан дойдуга Аҕам саастаахтар уонна Кыыс оҕо күннэригэр ананар, «Боотур Уус сыдьааннара» бырагыраама чэрчитинэн ыытыллыбыт «Үс кэрэ — үс ситим» улуустааҕы дьиэ кэргэн куонкуруһа үрдүк тэрээһиннээхтик ааста. Бу күрэх — биһиги улууспутугар 2018 сылтан ыытыллар, кэскиллээх утум. Кини сүрүн соруга — кыыс оҕо олоҕу салҕааччы, алаһа дьиэ араҥаччыта, удьуор утумун салҕааччы буоларын өйдөтүү. Кэрэни кэрэхсииргэ, үчүгэйи үксэтэргэ уһуйуу, эбэ, ийэ истиҥ сыһыаннарын холобуругар кыыс оҕону иитии — бу буолар тэрээһин сүрүн тускула. Быйылгы тэрээһин хаһааҥҥытааҕар да далааһыннанна. «Чурапчы улууһа» муниципальнай оройуон, үөрэх уонна култуура салалталара, «Айылгы» норуот айымньытын дьиэтэ, бэтэрээннэр сэбиэттэрэ, «Матери России» уопсастыбаннай тэрилтэ уонна «Бастыҥнар хамсааһыннара» — бука бары биир санаанан салайтаран, бу дьоро киэһэни тэрийэн ыыттылар. Оскуолалартан кэлбит 5 дьиэ кэргэн. Истиҥ-иһирэх ийэлэр, эйэҕэс эбэлэр, нарын-намчы кыргыттар — үс көлүөнэ биир түһүлгэҕэ түмүстүлэр. Кинилэр бэйэ-бэйэлэригэр истиҥ сыһыаннарынан, үтүө холобурдарынан бар дьону сөхтөрдүлэр. Күрэс түөрт түһүмэҕинэн, бииртэн биир уратытык, истиҥник барда: 1. «Кэрэни кэрэхсиибит» — илиинэн оҥоһук, ас-үөл быыстапката. Манна саха дьахтарын мындыр өйө, уус тарбаҕа, саха аһын эгэлгэтэ барыта түмүлүннэ. 2. «Кэрэ ситимэ» — бэйэни билиһиннэрии. Хас биирдии дьиэ кэргэн бэйэтэ туспа остуоруйалаах, ситиһиилээх. 3. Ийэ кыыһынаан үҥкүүтэ — ийэ кыыһын кытта биир тыыннанан, кэрэ матыыпка уйдаран хамсаныылара! 4. «Эбээ аптаах хоппото» — бу түһүмэх көрөөччүлэр куттарын тутта. 40-90-с сыллардааҕы гардеробтан тахсыбыт таҥастар — эбэлэрбит, хос эбэлэрбит эдэр эрдэхтэринэ кэппит былаачыйалара, былааттара — оччотооҕу кэм тыынын илдьэ сылдьаллар. Бу — история, бу — утум салҕаныыта. Күүрээннээх киирсии кэнниттэн, дьүүллүүр сүбэ быһаарыытынан, «Муҥутуур кыайыылаах» үрдүк аатын Чурапчытааҕы республиканскай спортивнай эрэллэри бэлэмниир интернат-оскуолатыттан Постниковтар дьиэ кэргэн ылан, үөрүү өрөгөйүн биллилэр. Бары кыттааччылар анал ааттары ылан, спонсордартан уонна тэрийээччилэртэн бириистэри туттулар. Тэрээһин дириҥ ис хоһоонноох, кэрэ тылларынан түмүктэннэ: «Кэрэ — кэрэни үөскэтэр, быстыспат ситим салҕанан көлүөнэттэн көлүөнэҕэ бэриллэр айылҕалаах. Харыстааҥ кэрэни, харыстааҥ кыыс оҕо быстыспат кэрэ ситимин!» Үс көлүөнэ кэрэ ситимэ үтүөнү түстүү, үөрүүнү үксэтэ турдун!