Алтынньы 9 күнүгэр Е. А. Борисов аатынан архив-библиотекаҕа улууспут оскуолаларын баста...
Алтынньы 9 күнүгэр Е. А. Борисов аатынан архив-библиотекаҕа улууспут оскуолаларын бастакы кылааһын учууталларыгар анаан тэрээһиннээх уонна ситиһиилээх семинар-консультация буолан ааста. Сыала — саҥа үөрэх дьылыгар үлэ хайысхатын быһаарыы, уопут атастаһыы уонна биир тэҥ ирдэбиллэри олохтооһун. Былаан быһыытынан маннык боппуруостар көрүлүннүлэр уонна ырытылыннылар: 1. Каллиграфия сорудахтарын көрүүтүн түмүгэ: Максимова Л. Е. оскуолаҕа киириэн иннинээҕи саастаах оҕолорго 2025-2026 үөрэх дьылыгар ыытыллыбыт каллиграфия сорудахтарын көрүүтүн түмүгүнэн сиһилии анализ оҥордо. Кини оҕолор илиилэрин былчыҥын сайыннарыыга, сурукка бэлэмнэниллибит таһымнарыгар сыаналаах бэлиэтээһиннэри уонна инникитин тугу уларытыахха наадатын ырытта. 2. С. А. Новгородов аатынан Чурапчы орто оскуолатын 2-с кылааһын учууталлара — Барашкова Т. Д., Сивцева О. Е., Ильинова Н. Д., Максимова Л. Е. — "Оҕо үөрэҕи ылыныытын үс тирэҕэ: ааҕыы, суруйуу, суот" диэн тиэмэҕэ бэйэлэрин уопуттарын үллэһиннилэр. Учууталлар бу хайысхаларга бэйэлэрэ күннээҕи үөрэх процеһыгар туттар, оҕоҕо тиийимтиэ уонна туһалаах ньымаларын (методтарын), бэйэлэрин булумньуларын кэпсээн, практическай сүбэлэри биэрдилэр. 3. Букубаар кинигэтин ырытыы: Бастакы үөрэнэр кинигэни — Букубаары — бары бииргэ ырыттыбыт. Манна кинигэ таһыма, уруокка туттарга табыгастаах өрүттэрэ уонна уустуктары үөскэтэр түгэннэрэ аһаҕастык кэпсэтилиннилэр. 4. Биир тэҥ ирдэбиллэри киллэрии: Максимова Л. Е. тэтэрээккэ үлэҕэ уонна күннүгү (дневниги) толорууга улуус үрдүнэн биир тэҥ ирдэбили киллэрии туһунан сүбэлэри уонна ирдэбиллэри билиһиннэрдэ. Бу алын кылаас оҕото бэрээдэккэ, ыраас, чөкө сурукка үөрэнэригэр улахан суолталааҕа бэлиэтэннэ. 5. Семинар практическай чааһыгар учууталлар бэйэлэрин үлэлэригэр, оҕону уонна төрөппүтү кытта алтыһыыга туттар туһалаах матырыйаалларын, электроннай хомуурунньуктарын, папкаларын уонна ураты идеяларын бэйэ-бэйэлэригэр көрдөрөн, электронно атастастылар уонна атыыластылар. Саҥа саҕалыыр учууталларга бу олус улахан методическай көмө буолла. Семинар-консультация сыалын- соругун ситтэ, туһалаахтык ааста. Кыттыбыт учууталлар бэйэлэригэр элбэх саҥа идеяны, үлэлииргэ күүс-уох уонна туһалаах матырыйааллары ыллыбыт. Биир тэҥ ирдэбиллэр олоххо киирэллэригэр үлэ барарыгар сөбүлэһэн тарҕастыбыт. Максимова Л.Е. - алын кылаас учууталларын улуустааҕы холбоһугун салайааччыта.