Одьулуун орто оскуолатыгар БИБЛИОТЕКА ДЕКАДАТА «Күргүөм ааҕыы» күрэҕинэн үөрүүлээхтик с...
Одьулуун орто оскуолатыгар БИБЛИОТЕКА ДЕКАДАТА «Күргүөм ааҕыы» күрэҕинэн үөрүүлээхтик саҕаланна Чурапчы улууһугар сыллата ыытыллар оскуола библиотекаларын декадата Одьулуун орто оскуолатыгар көхтөөхтүк саҕаланна. Быйылгы тэрээһин «Библиотеки, грамотность и искусственный интеллект» диэн уопсай тиэмэлээх ыытыллар. Оҕолор ааҕыыга көҕүлүүр, сатабылы сайыннарар араас тэрээһиннэргэ кыттан, элбэҕи билиэхтэрэ-көрүөхтэрэ. Декада биир дойдулаахпыт, талааннаах бэйиэт уонна тылбаасчыт Дмитрий Герасимович Дыдаев хоһооннорун күргүөмүнэн ааҕыы күрэҕиттэн саҕаламмыта сүдү суолталаах. Санатан этэххэ, ааспыт үөрэх дьылыгар бэйиэт төрөөбүтэ 90 сылын киэҥ далааһыннаахтык бэлиэтээбиппит. Ол кэмтэн оскуола библиотеката уонна тыл учууталларын методическай холбоһугун улахан бырайыага саҕаламмыта. Бу үлэ сүрүн сыала — оскуола оҕолоро сыллата Дмитрий Дыдаев хоһооннорун үөрэтэн, оскуоланы бүтэрэллэригэр киэн тутта кэпсиир, кини айымньыларын киэҥ эйгэҕэ тарҕатар дьон буола улааталларыгар туһуланар. Тэрээһин үөрүүлээх арыллыытыгар ааспыт сыллаах күрэх кыайыылаахтара, билигин 7-с кылаас үөрэнээччилэрэ, мустубут дьоҥҥо-сэргэҕэ Д. Дыдаев «Ыйы таптал төрөппүтэ» диэн хоһоонунан истиҥ эҕэрдэлэрин ууннулар. «Күргүөм ааҕыы» күрэҕин таһымын уонна оҕолор маастарыстыбаларын сыаналыыр дьүүллүүр сүбэҕэ үлэлээтилэр: • Таисия Григорьева — Одьулуун нэһилиэгин модельнай библиотекатын сэбиэдиссэйэ; • Акулина Неустроева — саха тылын уонна литературатын учуутала; • Дарья Посельская — омук тылын учуутала. Оскуола библиотекара Туйара Максимова быйылгы декада былаанын сиһилии билиһиннэрдэ. Декада чэрчитинэн Старай Русса куораттан Чурапчы улууһа бэлэх туппут «В Семёново -на родину Рахманинова» диэн сэдэх кинигэлэрин үөрүүлээх быһыыга-майгыга алын кылаас оҕолоругар туттарда. Маны тэҥэ, быйылгы үөрэх дьылыттан саҕалаан хас биирдии кылаастан анал «Библио-навигатор» оҕолор талыллан, оскуола иһинэн үлэлиир саҥа кулуупка киирдилэр. Кинилэр инникитин «Чтецкие клубы» тэрээһиннэригэр көхтөөхтүк кыттыахтара. Саҥа тэриллибит кулууп чилиэннэрэ оскуола оҕолорун кинигэ кэрэ эйгэтигэр угуйуохтара, кылаастарын улуустааҕы «Самый читающий класс» күрэххэ кыайыыга сирдиэхтэрэ. Оскуолабыт үөрэнээччилэрэ БИБЛИОТЕКА ДЕКАДАТЫГАР көхтөөх кыттыыны ылан, күрэхтэргэ кыттан үрдүк ситиһиилэри дабайалларын баҕарабыт!