Алтынньы 15 күнүгэр «Үөрэх тэрилтэлэригэр иитии үлэтин тэрийии» диэн улуустааҕы сэминээ...
Алтынньы 15 күнүгэр «Үөрэх тэрилтэлэригэр иитии үлэтин тэрийии» диэн улуустааҕы сэминээр 3 сылга диэри уопуттаах дириэктэри иитэр үлэҕэ солбуйааччыларга, социальнай педагогтарга анаан, бу эйгэҕэ саҥа үктэнэр исписэлиистэргэ төһүү күүс буолан ыытылынна. Манна уопсайа 10 педагог кыттыыны ылан, иитии үлэтин сүрүн хайысхаларын, соруктарын уонна ирдэбиллэрин толору билистилэр. Сэминээр сүрүн чааһын Чурапчы улууһун Үөрэҕин салалтатын исписэлиистэрэ иилээн-саҕалаан ыыттылар, хайысхаларынан киэҥ иһитиннэриини оҥордулар: 🔹 Е.И. Чичигинарова иитии үлэтин сүрүн олуктарын билиһиннэрдэ, дойдуга бэриниилээх буолуу, патриотическай иитиигэ ураты болҕомтону уурарга ыҥырда. Улуус үрдүнэн көдьүүстээхтик үлэлиир «Боотур Уус сыдьааннара» муниципальнай бырагыраама киэҥ хабааннаах үлэтин сырдатта. 🔹 Е.Р. Хоютанова оскуолаҕа буруйу оҥорууну сэрэтиигэ үлэни билиһиннэрдэ, ирдэнэр докумуоннары, нормативнай-правовой уонна локальнай акталары сиһилии ырытан, сааһын ситэ илик оҕо сокуону кэһиитин сэрэтэр ньымалары иһитиннэрдэ. 🔹 Л.Г. Винокурова оҕо доруобуйатын харыстабылыгар, итии аһылыгынан хааччыйыыга уонна гигиеническэй иитиигэ инструктордар, медицинскэй үлэһиттэр оруолларыгар болҕомтону уурда. 🔹 Баина М.П. — «Билет в будущее» Бүтүн Арассыыйатааҕы бырайыак көдьүүһүн уонна инники соруктарын билиһиннэрдэ; 🔹 Филиппова М.Н. — Чурапчы улууһугар оҕо успуордун сайдыытын кэпсээтэ; 🔹Илларионов Д.А. — үөрэх тэрилтэлэригэр быһылааннары силиэстийэлээһин уонна сөптөөх үлэни тэрийиигэ, болҕомтолоох буолууга ыҥырда. Тэрээһин ыҥырыылаах ыалдьыттара эмиэ бэйэлэрин суолталаах этиилэрин тиэртилэр: 🔹 Уйулҕа, иитии-үөрэтии, чөл турук уонна олох-дьаһах өттүнэн көмөнү оҥорор киин салайааччыта А.С. Капрынова анал байыаннай дьайыы кыттыылаахтарыгар уонна кинилэр дьиэ кэргэттэригэр оҥоһуллар өйөбүл миэрэлэрин туһунан кэпсээтэ. 🔹 «Оҕо саас сирдьиттэрэ» ресурснай киин муниципальнай куратора Е.И. Горохова «Навигаторы детства» федеральнай бырайыак олоххо киириитин билиһиннэрдэ. Иитии үлэтигэр үлэлии сылдьар педагогтар бэйэлэрин үлэлэрин үллэһиннилэр: ✅ С.К. Макаров аатынан Чурапчы гимназиятын дириэктэри иитэр үлэҕэ солбуйааччыта О.С. Данилова иитии бырагырааматын оҥорууга сүбэ-ама биэрдэ. ✅ С.Т. Захаров аатынан Төлөй орто оскуолатын дириэктэри иитэр үлэҕэ солбуйааччыта И.Г. Васильев оскуола иһинэн үлэлиир рейтинговай систиэмэ уонна Чурапчы чулуу дьонун үөрэтиигэ туһуламмыт бырайыак туһунан сырдатта. Бу курдук, саҥа анаммыт иитии үлэтин исписэлиистэригэр анаммыт сэминээр көдьүүстээхтик ааста. Маннык тэрээһиннэр инники үлэҕэ саҥа саҕахтары арыйар, таһаарыылаахтык айарга-тутарга бигэ олугу уурар улахан суолталаахтар.