Арассыыйаҕа Аҕалар, Саха сиригэр Ийэлэр күннэринэн итии-истиҥ эҕэрдэ!
Арассыыйаҕа Аҕалар, Саха сиригэр Ийэлэр күннэринэн итии-истиҥ эҕэрдэ! Аҕа — дьиэ кэргэн дурдата, эрэллээх эркинэ, олоххо суолу тэлээччи. Кини холобуругар оҕо күүстээх санаалаах, эппиэтинэстээх, бэйэтигэр эрэллээх, дойдутун таптыыр киһи буола улаатар. Ийэ — олох төрдө, сылаас тыыннаах алаһа дьиэбит киинэ. Кини тапталынан, кыһамньытынан оҕо уйулҕата уоскуйар, өйө-санаата сайдар. Ийэ оҕотугар тыл баайын, сиэр-майгы ырааһын, кэрэҕэ тардыһыыны иҥэрэр. Аҕа уонна Ийэ — бу дьиэ кэргэн икки кыната, олох икки тэҥ кэскилэ. Кинилэр бииргэ буоллахтарына, дьиэ иһэ сырдыгынан, сылааһынан туолар, оҕо кутун-сүрүн кынаттыыр. Дьиэ кэргэн сылаас эйгэтигэр, тапталга уонна өйдөһүүгэ олоҕуран, оҕо майгыта-сигилитэ уһаарыллар, кини киһи быһыытынан сайдар суолун акылаата ууруллар. Оскуола биэрэр дириҥ билиитэ дьиэ кэргэҥҥэ иҥэриллибит үтүө сиэри-майгыны кытта силбэстэҕинэ эрэ, оҕо дьиҥнээх ис кыаҕа арыллар, кини үөрэххэ тардыһыыта күүһүрэр уонна олоххо бэлэмнээх, эппиэтинэстээх киһи буола улаатар. Оскуола уонна дьиэ кэргэн ситимэ — үөрэх-иитии үлэтин биир сүрүн тирэҕэ. Улууспутугар төрөппүт кэмитиэттэрэ, ийэлэр уонна аҕалар холбоһуктара оскуола, уһуйаан олоҕор көхтөөхтүк кыттан, оҕо бары өттүнэн сайдыылаах киһи буола улаатарыгар араас хайысхалаах, ситимнээх үлэни ыытан улахан көмөнү оҥороллорун бэлиэтиибит, махтанабыт. Оҕолорбут дьоллоох харахтара, ситиһиилэрэ — бу биһиги улахан кыайыыбыт, үөрүүбүт. Бары ийэлэргэ, аҕаларга чэгиэн доруобуйаны, дьолу-соргуну, уһун, дьоллоох олоҕу баҕарабыт! Дьиэ кэргэҥҥитигэр өрүү ил-эйэ, өйдөһүү уонна таптал эрэ эҥэрдэстин. Эһиги баар буолаҥҥыт, олох салҕанар, кэскил кэҥиир, дойдубут бөҕөргүүр. Эҕэрдэни кытта Чурапчы улууһун үөрэҕин салалтата