Бэс ыйын 5 күнүттэн Тандатааҕы М.Н.Готовцев аатынан орто оскуолаҕа «Кэскил» сайыҥҥы оҕ... — 16 июня 2026 г. в 02:07:52.927
Бэс ыйын 5 күнүттэн Тандатааҕы М.Н.Готовцев аатынан орто оскуолаҕа «Кэскил» сайыҥҥы оҕо лааҕыра үлэтин саҕалаабыта. Манна 1 — 10 кылаас оҕолоро сылдьаллар. Икки этэрээккэ арахсан лааҕыр иһинэн араас күрэхтэри ыыталлар. Лаа5ыр аата мээнэҕэ «Кэскил» диэн буолбатах, сүрүн сыалынан оҕону кыра эрдэҕиттэн үлэнэн иитии, оскуола кэнниттэн дьарыктаах буолууларын хааччыйыы, чөл олоҕу, успуорду көҕүлээһин. Лааҕырга үөрэнээччилэр оҕуруот аһын олордууга, көрүүгэ көмөлөһөллөр. Оҕону үлэнэн иитии оскуола кэнниттэн бэйэтин миэстэтин түргэнник булунарыгар, тугунан дьарыктанабын, туох идэлээх киһи буолан тахсабын диэн ыйытыытыгар хоруйдуур биир сүрүн күүс буолар. Онуоха оскуолаҕа ылбыт үөрэҕэ, билиитэ төрүөт буолуохтаах. Оҕо ханнык да идэни баһылаатын кини олоҕор туттар сатабыллары, үөрүйэхтэри оскуола саҕаттан баһылыахтаах. Бэс ыйын 6 күнүгэр А.С.Пушкин төрөөбүт күнүгэр оскуолабыт библиотеката тэрийэн ыыппыт тэрээһинигэр кыттыыны ылбыппыт. Бэс ыйын 12 күнүгэр, Россия күнүн көрсө оҕолор үлэһиттэр Россия гимнын ыллаатыбыт, хорсун буолуу уруогун ыыттыбыт. Оҕолор сайыҥҥы лааҕыр кэмигэр араас көрдөөх-нардаах тэрээһиннэргэ кыттан, профилактическай, профориентационнай үлэлэргэ кыттыыны ылан сайыҥҥы сынньаланнарын атаарыахтара. Ити курдук күнүн аайы сонунтан сонун дьарыктар күүтэллэр. ✍🏼 Нюргуяна Находкина, Танда орто оскуолата