Дойдубутугар Норуоттар Сомоҕолоһууларын, Мэҥэ Хаҥалас улууһугар олохтоох бэйэ оҥорон та... — 18 июня 2026 г. в 05:11:38.332
Дойдубутугар Норуоттар Сомоҕолоһууларын, Мэҥэ Хаҥалас улууһугар олохтоох бэйэ оҥорон таһаарыы, олоҥхоһут Гаврил Николаевич Ларионов –Халлаан Хабырыыс төрөөбүтэ 135 сылларыгар аналлаах «Ороссолуода нэһилиэгэ Олоҥхо Ыһыаҕын уруйдуур!» XIV төгүлүн ыытыллыбыт улуустааҕы Олоҥхо ыһыаҕа. “ОЛОҤХО - СОМОҔОЛУУР КҮҮС!” К.П. Гаврильев-Кинтэн кэрэ тиэргэнигэр Олоҥхо... Үс үллэр үөстээх, үлүскэннээх сүүрүктээх, өҥ быйаҥ тыыннаах Өлүөнэ эбэ тардылаах, үрдүк бэс чагда мырааннардаах, үгүс үтүө дьоннордоох оҕуруот аһынан аатырбыт Ороссолуода нэһилиэгэр ыраахтан сирдэртэн ыҥырыынан ыйдаран, чугас бааллар чуоранынан сирдэтэн, уус-уран, хомоҕой тыллаах олоҥхоһуттар, ылбаҕай ырыаһыттар, хомоҕой хоһоонньуттар Гаврил Николаевич Ларионов – Халлаан Хабырыыс төрөөбүтэ 135 сылларыгар аналлаах «Ороссолуода нэһилиэгэ Олоҥхо Ыһыаҕын уруйдуур!» XIV төгүлүн ыытыллыбыт улуустааҕы Олоҥхо ыһыаҕар муһуннулар. Быйылгы Олоҥхобут ыһыаҕын бастакы күнэ Саха Өрөспүүбүлүкэтин искусствотын үтүөлээх диэйэтэлэ, СӨ норуодунай худуоһунньуга, Арассыыйа худуоһунньуктарын сойууһун чилиэнэ, өр кэмнэргэ ПП.Романов аатынан Дьокуускайдааҕы ойуулуур дьүһүннүүр анал үөрэх кыһатын салайааччытынан үлэлээбит Кирилл Петрович Гаврильев-Кинтэн ураты оҥоһуулаах, кэрэ тиэргэнигэр ыытылынна. Кэлбит эрэ барыта Кирилл Петрович ханна да суох мааны, ураты, дьэрэкээн оҥоһуулаах, тутуулаах тиэргэнинсэргээтилэр, Олоҥхо истии киэһэтин алгыһын Гавриил Колесов аатынан Олоҥхо Дьиэтин фолькорга уһуйааччыта, олоҥхоһут Н.И.Степанов – Ноорой иилээн саҕалаан ыытта, алгыһы Олоҥхо Дьиэтин алгысчыта Денис Оконешников көтөхтө, Ороссолуода нэһилиэгин баһылыга Иван Васильевич Афанасьев, тиэргэннээх Кирилл Петрович Гаврильев, СӨ Олоҥхо Ассоциациятын президенэ Февронья Васильевна Шишигина, Гавриил Колесов аатынан Олоҥхо Дьиэтин салайааччыта Васильева Айта Семеновна кэлбит ыалдьыттары эҕэрдэлии көрүстүлэр, Арктикатааҕы судаарыстыбаннай култуура уонна искусство университетын устудьуоннара ырыанан-тойугунан киэргэттилэр. Дьүүллүүр сүбэҕэ СӨ Олоҥхо Ассоциациятын президенэ Февронья Васильевна Шишигина, СР Ил Дарханын стипендиата, Г.Г. Колесов аатынан бэлиэ хайааһына, СӨ Дархан оһуохайдьыта, Олоҥхо күрэхтэрин кылаан кыайыылааҕа, СӨ култууратын туйгуна Виталий Витальевич Никифоров, Олоҥхо педагогикатын үҕрэтээччи, тарҕатааччы, педагог-маастар Наталия Иннокентьевна Мордовская үлэлээтилэр. Бастакы күн ытык мааны олоҥхону толорооччу Гаврил Спиридонов (2 Тыыллыма), Айталина Верховцева (Дьанхаады), Галина Зыкова (Тараҕай), Александра Попова (Аллараа Бэстээх), Сайыына Шамаева (Бүлүү) Кинтэн ураһатын иһигэр, көмүлүөк оһох иннигэр оллоонноон олорон олоҥхолообуттарын сэргии иһиттибит. Сиэр-туом түһүлгэтэ.Күнү көрсүү. Олоҥхо ыһыаҕа-бу икки күннээх олоҥхо истиитин күрэҕэ, ыһыаҕы тэрийии эрэ дииргэ татым. Олоҥхо ыһыаҕын ыытар сүрүн сыалбыт-сорукпут диэн: дьоҥҥо-сэргэҕэ ыһыах хайдах ыытыллыахтааҕын көрдөрүү, төрүт үгэһи тутуһан сиэри-туому толоруу, тэрээһин таһымын үрдэтии, саха норуотун уус-уран нэһилиэстибэтин – олоҥхону тарҕатыы, үөрэтии, үйэтитии, нэһилиэк олохтоохторун түмэ тардан хамсатыы, өр кэмҥэ кэрэ кэпсээн, уос номоҕо буолар дьоһун түһүлгэни тэрийии буолар. Быйылгы Олоҥхо Ыһыаҕар Рассолода нэһилиэгин ыһыахтыыр түһүлгэтигэр сабыс саҥа сиэр-туом түһүлгэтэ тутуллан силигин ситэн нэһилиэк олохтоохторугар үтүө бэлэх буолла. Хас да сыллаҕыта нэһилиэк ыһыахтыыр түһүлгэтигэр Кирилл Петрович Гаврильев –Кинтэн томтор үрдүгэр, ураты оҥоһуулаах аал-луук маһы туруорбута, эрдэттэн билбит уонна анаабыт курдук бу томтор сиэр-туом түһүлгэтэ буолла. Бу мааны тутуу олоххо киирэригэр Мэҥэ Хаҥалас улууһун дьаһалтата, баһылык Дмитрий Иванович Тихонов, Гавриил Колесов аатынан Олоҥхо дьиэтэ олук буоллулар, Рассолода нэһилиэгин баһылыга Афанасьев Иван Васильевич олохтоох эр дьону түмэ тардан кылгас кэм иһигэр күүстээх үлэни ыытта, сиэр-туом түһүлгэтин бары ирдэбилин тутуһан, алгысчыт, сиэри-туому тарҕатааччы, хомус ууһа Роман Владимирович Иванов-Аар Аман Далан Уус сүрүннээтэ. Рассолодаҕа Мэҥэ Хаҥалас улууһун нэһилиэктэригэр биир