Алтынньы 30 күнүгэр Дьокуускайдааҕы култуура уонна ускуустуба колледжын учуутала, көхтө...
Алтынньы 30 күнүгэр Дьокуускайдааҕы култуура уонна ускуустуба колледжын учуутала, көхтөөх төрөппүппүт Михаил Николаевич Степанов тус салайыытынан "Үүнэ-чэчирии тур, Сахам гимназията" оскуолабыт 25 сыллаах үлэтин бэлиэтиир өрөгөйдөөх түһүлгэтэ олус таһымнаахтык уонна өрө көтөҕүллүүлээхтик буолан ааста. Култуура уонна ускуустуба колледжын устудьуоннара (социально-культурная деятельность), үлэһиттэрэ ис сүрэхтэриттэн кыһаллан үлэлээн, бу күммүт үөрүү-көтүү аргыстаах, ырыа-эҕэрдэ кэһиилээх бэркэ ааста. Кэлбит дьону киирэр аантан саҕалаан сахалыы матыыптаах ырыанан кууһан, кыһыл доруосканан хаамтаран, атыы-кутуу быыстапкатыгар-дьаарбаҥкатыгар сырытыннаран сылаас эйгэҕэ киллэрдилэр. Салгыы устудьуоннар фотозонаҕа хаартыскаҕа түһэрэн, тэрээһини видеоҕа устан көмүс түгэни үйэтиттилэр. Тэрээһин 3 чааска араарыллан ыытылынна. Бастаан утаа иккис этээскэ күндү төрөппүттэрбит быыстапка-дьаарбаҥка тэрилиннэ. Манна араас кэрэ бэйэлээх оҥоһуктар, амтаннаах ас арааһа дэлэгэйдик тардыллынна. Олус да уран тарбахтаах, амтаннаах астаах төрөппүттэрдээхпит диэн үөрдүбүт-астынныбыт. Онтон өрөгөйдөөх чааһыгар долгуйан туран ыҥырыылаах ыалдьыттар эҕэрдэлэрин эттилэр, наҕараада туттартаан учууталлары, үлэһиттэри, төрөппүттэри үөрүүлэрин үксэттилэр. Салгыы айымньылаах чааспыт үүнэн араас ылбаҕай ырыалары иһиттибит, кэрэ дьүһүйүүлэри көрдүбүт, араас үҥкүүлэри сэргээтибит. Түгэнинэн туһанан, күндү төрөппүппүт, Михаил Николаевич, Саха гимназиятын салалтатын, бары учууталларын, төрөппүттэрин уонна оҕолорун ааттарыттан оскуолабыт 25 сылын бэлиэтиир үөрүүлээх, өрөгөйдөөх тэрээһиммитин үрдүк таһымнаахтык иилээн-саҕалаан ыыппытыҥ иһин ис сүрэхпититтэн дириҥ махталы тиэрдэбит. Бу күүрээннээх уонна кыһамньылаах үлэҕин олус үрдүктүк сыаналыыбыт. Эн сыраҥ, тэрийэр дьоҕуруҥ уонна хас биирдии киһиэхэ сылаас сыһыаныҥ тиийимтиэ буолан, бу бэлиэ күн хас биирдиибитигэр умнуллубат сырдык өйдөбүлү уонна кэрэ түгэни бэлэхтээтэ. #СГ25 #СахаГимназия25сыла #ӨрөгөйдөөхДэкээдэ