А. Г. уонна Н.К. Чиряевтар ааттарынан Дьокуускай куорат национальнай гимназията төрүттэ...
А. Г. уонна Н.К. Чиряевтар ааттарынан Дьокуускай куорат национальнай гимназията төрүттээбит ,үтүө үгэскэ кубулуйбут “Чирээйэптии ааҕыылар” тэрээһиҥҥэ төрөппүттэр тоҕуоруһа мустан, оҕону иитии сүрүн кистэлэҥнэрин үллэһиннилэр. Быйылгы дьыллааҕы ааҕыыларга, үтүөкэннээх дьоммут этнопедагогтар : Г.Н.Волков, К.С.Чиряев 2027 сылга төрөөбүттэрэ 100 сылын көрсө, норуот педагогикатын хоһун арыйыы сиэрэ-туома буолла. “Олох үөрэҕэ” норуот педагогикатын хоһун арыллыытыгар СӨ Ытык Сүбэтин чилиэнэ, дьиэ кэргэн хараанньыта, учуутал-суруналыыс “Л.С.Аргунова , билим Академиятын төрөөбүт тылы чинчийэр, харыстыыр уонна сайыннарар киин салайааччыта , педагогическай наука доктора, профессор, академик Ф.В.Габышева, саха оҕотун иитиигэ, уһуйууга үтүөкэннээх учуутал А.К.Чиряев, “Айыы үөрэҕэ” туом бахсыта И.Е.Лукина-Уйусхаана, “Уран” тэрилтэ салайааччылара, ойууһут-дизайнер Екатерина Яроева, СӨ култууратын туйгуна, олоҥхоҕо оҕону уһуйааччы маастар педагога Н.И.Мордовская , гимназия төрөппүттэрэ уонна “Ситим” Эбээ, Эһээ түмсүүтэ кыттыыны ыллылар. “Чирээйэптии ааҕыылар” тэрээһин оҕолорбутун, кэнчээри ыччаппытын инникигэ эрэллээх, бигэ тирэхтээх буола улааталларыгар сөптөөх хайысханы тутуһарга салайар. Оҕо-ыал-оскуола-учуутал биир ситим буолан сайдыы суолун тутуһан сахалыы куттаах ыччаты иитиигэ сонун соруктары арыйар. Учууталлар, төрөппүттэр биир сомоҕо буолан бука бары түмсэн, салайсан, көмөлөсүһэн иитии-үөрэтии үлэтэ олус таһаарыылаахтык барарын туһунан төрөппүт кэмитиэтин бэрэссэдээтэлин солбуйааччы Нь.Д. Илларионова билиһиннэрдэ. Хас биирдии төрөппүт мунаахсыйара, сүбэлэтэрэ баар суол, сүбэлиирэ да аҕыйаҕа суох буолар. Онон “Чирээйэптии ааҕыылар” эдэр төрөппүккэ сүбэ, сирдьит уонна көмө буолалларын бэлиэтээтэ. Үөрэнээччилэр, учууталлар, төрөппүттэр итиэннэ эбэлэр, эһэлэр бука бары биир улахан дьиэ кэргэн курдук түмсүүлээхтэр. Гимназия иһинэн үлэлиир “Эбээ Ситимэ” эбэлэр түмсүүлэрэ оҕо иитиитигэр бэйэтин кылаатын киллэрэрэ улахан суолталаах.(сал. Э.С. Петроваҕа.) “Балаҕан –баҕанатынан, ыал –аҕатынан. Уол оҕо - кэскилбит, эр киһи -эрэлбит” - гимназиябыт Аҕаларын түмсүүтэ (сал. А.С. Попов) инники былааннарын иһитиннэрдэ. Гимназияҕа куорат оҕото сахалыы табыгастаах эйгэҕэ сайдарын, үөрэнэрин туһугар бары күүһү ууралларарын, бу эйгэҕэ оҕо бэйэтин кыаҕар эрэллээх, инники тус соруктардаах, сайдыы суолун батыһар киһи буола улаатарын туһунан В. Н. Никитина “Ийэ тыл кэскилэ” өрөспүүбүлүкэтээҕи хамсааһын салайааччыта санааларын үллэһиннэ. Төрөппүттэр баҕа санааларын , идиэйэлэрин сүрүннүүр Киин тэриллэн, Саха сирин үрдүнэн “Төрөппүтү кытта дьоһуннааҕы кэпсэтии” бырайыак таһаарыылаахтык үлэлиир. Инникитин сайдыылаах соруктарын туһунан салайааччы Е.В. Пинигинаҕа билиһиннэрэн кэпсээтэ. “Чирээйэптии ааҕыылар” тэрээһиҥҥэ ордук төрөппүт көхтөөхтүк кыттара хайҕабыллаах. Бу сыллар устата Ааҕыылар түмүктэринэн хомуурунньуктар бэчээттэммиттэрэ, дьиэ кэргэн бырайыактарынан кылаас бүттүүнэ түмсэн иитэр үлэ эйгэтэ сайдан тахсыбыта. Быйылгы ааҕыыларга уопсайа 21 араас хайысхалаах бырайыактары көмүскээтилэр. Бырайыактар туһунан бэйэтин санаатын “Оҕо саас сирдьиттэрин” Региональнай ресурснай киинин дьиэ кэргэни кытта үлэлиир сүрүн специалиһа Т. П. Ойунская эттэ. “Чирээйэптии ааҕыылар” тэрээһин саҥа көрүүлэрэ, саҥа санаалара, саҥа арыйыылара олоххо киирэн саха оҕото сайдыы ыллыгын тэлэригэр олук ууруохтун.