🔔 Билии күнүнэн ! 🍁
🔔 Билии күнүнэн ! 🍁 Күндү үөрэнээччилэрбит, учууталларбыт, оскуола бары үлэһиттэрэ уонна төрөппүттэр! Мэҥэ Хаҥалас улууһун үөрэҕин салалтатын аатыттан ис сүрэхпиттэн бүгүҥҥү бэлиэ күнүнэн эҕэрдэлиибин! Балаҕан ыйын 1 күнэ — саҥа саҕахтары арыйар күммүт. 📝 Бастакы кылаас боруогун атыллыыр кырачааннарга уонна кинилэр дьиэ кэргэттэригэр Билии киэҥ, аптаах дойдута арыллар долгутуулаах түгэнэ тосхойор. Эһиги — биһиги улууспут инники кэскилэ буолаҕыт. Саҥа үрдэллэргэ дабайан, туйгун үөрэнээччи аатын чиҥэтэн, сырдыкка, билиигэ тардыһыыгыт уостубатын! 🎓 Элбэҕи эрэннэрэр бүтэһик чугдаарар чуорааннара чугаһаан эрэр оскуоланы бүтэрээри сылдьар выпускниктарбытыгар туспа истиҥ тыллары аныыбыт. Бу сыл — эһиэхэ олох суолугар бастакы эппиэтинэстээх тургутуунан буолуоҕа. Бүгүҥҥү күнтэн эксээмэннэргэ бэлэмнэнии эппиэттээх кэмэ саҕаланар. Күндү оҕолор, талан ылбыт идэҕитигэр сөптөөх үөрэх кыһаларын булан киирэргитигэр баҕарабыт. Олоххо миэстэҕитин булан, төрөөбүт дойдубут сайдарын туһугар таһаарыылаахтык үлэлиир-хамсыыр дьон буолан тахсаргытыгар эрэнэбит! 💐Ураты махтал тылларын улууспут үөрэҕириитин сайдыытыгар үйэлэрин тухары анаабыт ытыктабыллаах бэтэрээн учууталларбытыгар аныыбыт. Эһиги баай билиигит, муударай сүбэҕит уонна идэҕэ бэриниилээх сыһыаҥҥыт — хас биирдиибитигэр чаҕылхай холобур. 👩🏫👨🏫Эдэр исписэлиистэрбитигэр айымньылаах суолу,саҥа сүүрээннэри уонна үрдүк таһаарыылаах үлэни баҕарабын! Эрчимнээх санааҕыт, сонун көрүүлэргит үөрэх хаачыстыбатын саҥа кэрдиискэ таһаарарыгар эрэнэбин. Бүгүҥҥү дьоро күн оскуолаларга эрэ буолбакка, оҕо уһуйааннарыгар уонна эбии үөрэхтээһин тэрилтэлэригэр дьоһуннаах суолталаах. Оҕо дьоҕурун, талаанын уһугуннарар сыралаах үлэҕитигэр интэриэһинэй бырайыактары, элбэх ситиһиилэри уонна үтүө түмүктэри баҕарабын! 💫Билии киэҥ аартыга оҕолорго — ситиһии, төрөппүттэргэ — киэн туттуу, учууталларга — айар кыаҕы сахтын! Барыгытыгар чэгиэн доруобуйаны, тус олоххутугар дьолу-соргуну баҕарабын! Мэҥэ Хаҥалас улууһун үөрэҕириитин салалтатын салайааччыта Ирина Плотникова