Тэрилтэ салайааччыларын үлэни -хамнаһы торумнуур мунньахтарын улуус Аҕа баһылыга Инноке... — 3 июня 2026 г. в 05:27:26.069
Тэрилтэ салайааччыларын үлэни -хамнаһы торумнуур мунньахтарын улуус Аҕа баһылыга Иннокентий Стручков салайан ыытта. Оҕо сынньалаҥын кэмэ саҕаланна. Ону тэҥэ, бэрээдэк чааһыгар төрөппүтэр икки бүк эппиэтинэстэрэ үрдүүр. Хомойуох иһин, бу күннэргэ оскуола саастаах оҕолор мөкү быһыылара, токсикоманиянан үлүһүйүүлэрэ бэлиэтэннэ. Бу сүрдээх кутталлаах дьаллык. Оҕо бэйэтэ да өйдөөбөтүнэн мэниктээн боруобалаан баран, араас түмүккэ тиийиэн сөбүн бары өйдүүбүт. Оҕолорбут чөл өйдөөх, чэгиэн туруктаах буолалларын ситиһэргэ төрөппүт-уопсастыба-тустаах тэрилтэлэр бары түмсэн, биир санаанан салайтаран тиһиктээх үлэни ыытарбыт ирдэнэр. Оччотугар эрэ үтүө түмүк тахсыаҕа. Эн оҕоҥ-эн кыһалҕаҥ, диэн буолбакка, хас биирдиибит кэнчээрибит туһугар турууластахпытына сатанар. “Сайыҥҥы сынньалаҥ лааҕырдара үлэлэрин саҕалаатылар. Ол курдук, Оҕо саас киинигэр бэс ыйын 1 күнүттэн куруһуоктар үлэлииллэр. Кустуурга, Дьарҕаалаахха бэс ыйын 3 күнүттэн саҕаланаллар. Онтон Саккырыыр оскуолатын баасатыгар лааҕыр от ыйыгар үлэлиэҕэ. “Тиһэх чуораан” тэрээһинэ биллэр биричиинэнэн көһөрүллэн бэс ыйын 3 күнүгэр 9 уонна 11 кылаастарга ыытыллыаҕа”, — үөрэх салалататын салайааччыта Устин Николаев. Аармыйаҕа сулууспалааһын — бу 18 сааһын туолбут эдэр дьон доруобуйаларын туругуттан көрөн, бука бары дойду иннигэр толорор ытык иэстэрэ. Ол эрэн, билиҥҥи халбархай кэмнэргэ төрөппүт оҕотун аармыйаҕа ыыта сатаабат. Онуоха 113№-дээх федеральнай сокуоҥҥа киирбит альтернативнай гражданскай сулууспа диэн баар. Альтернативнай сулууспа срочнай байыаннай сулууспа оннугар көрүллэр. Бу сулууспаҕа кимнээх барыахтарын сөбүн туһунан сокуоҥҥа маннык суруллар: “На альтернативную службу могут идти те, кто по убеждению или вероисповеданию не могут нести военную службу и представители КМНС”. Бу күннэргэ Ил Түмэн таһымыгар маннык сулууспа тула киэҥ мунньах буолан ааста. Мунньаҕы Хоту сир дьыалаларыгар бастайааннай Кэмитиэт бэрэссэдээтэлэ Елена Голомарева, дьокутаат Александр Подголов көҕүлээтилэр, байыаннай комиссариат, Дьарыктаах буолуу кэмитиэтэ, Арктика министиэристибэтин бэрэстэбиитэллэрэ кыттыыны ыллылар. Араас хайысхаларга, чуолаан тыа хаһаайыстыбатын эйгэтигэр хаадырынан хааччыллыы быстар мөлтөөбүтэ бэлиэтэнэр. 2025 сыллаахха альтернативнай гражданскай сулууспаны ыытар быраап испииһэгэр киллэриигэр үгүс сайаапка сыыйыллыбыта, сыыйыы сүрүн биричиинэтинэн сокуон ирдэбиллэригэр эппиэттээбэттэринэн. Сулууспаны аһардар тэрилтэлэр ахсааннарын хаҥатарга үлэ салҕанар. Бүгүҥҥү күҥҥэ өрөспүүбүлүкэҕэ барыта 11 тэрилтэ альтернативнай гражданскай сулууспаны аһардар кыахтаах. Бэрээдэккэ олоҕуран маннык сулууспаны ааһыан баҕалаах эдэр киһи сайабылыанньатын 6 ый иннинэ биэриэхтээх. Холобур, күһүҥҥү ыҥырыыга хабыллар киһи сайабылыанньатын муус устар 1 күнүгэр диэри биэриэхтээх. Онтон, сааскы ыҥырыыга түбэһэр киһи алтынньы 1 күнүгэр диэри биэриэхтээх(сиһилии хаһыат кэлэр нүөмэрдэригэр тахсыаҕа). Альтернативнай сулууспаны ыытар быраап 6 таба иитэр хаһаайыстыбаларга бэриллэн турар. Биһиги улуус эмиэ сайаапка биэрэн турабыт, эппиэт кэлэ илик. Бүгүҥҥү күҥҥэ өрөспүүбүлүкэттэн барыта 6 киһи альтернативнай гражданскай сулууспаны ааһа сылдьаллар, мантан 5 киһи Саха сиригэр, 1 киһи Бурятияҕа. Хаарбах дьиэттэн көһөрүү бырагыраманан тутулла турар дьиэ матырыйаала барыта кэмигэр толору тиэрдиллбитэ. Билиҥҥи кэмҥэ тутуу күргүөмнээхтик ыытыллар. ОДьКХ экэнэмиичэскэй балаһыанньатын бары билэбит. Тэрилтэ үлэһиттэрэ хамнастарыгар күүскэ оҕустардылар, бу дьиэ кэргэннэрин бүддьүөттэригэр, кирэдьиит уонна да атын төлөбүрдэригэр улахан кыһалҕаны үөскэттэ. Кинилэргэ хамнас чааһа коммунальнай өҥө иһин төлөбүртэн оҥоһуллар. Биһиги улуус дьаһалтата, тэрилтэлэрэ коммунальнай өҥө иһин төлөбүргэ улахан иэспит суох. Онтон нэһилиэнньэ 8 мөл.солк. иэстээх. Мантан сиэттэрэн ыам ыйын 28 күнүттэн өрөспүүбүлүкэҕэ “Начни с себя” аахсыйа ыытыллар. Аахсыйаны СӨ ОДьКХ Министиэристибэтэ көҕүлээтэ.