Күндү кэрэ Куолар, Далбар Хотуттар! — 8 марта 2026 г. в 03:08:59.034
Күндү кэрэ Куолар, Далбар Хотуттар! Эһигини сааскы маҥнайгы бырааһынньыгынан — Аан дойду дьахталларын күнүнэн истиҥник эҕэрдэлиибин! Күндү дьоммут сандал саас курдук өрүү кэрэҕит, олоххо үөрүүнү, дьолу түстүүр аналлааххыт. Уҕараабат эрчимҥитинэн бары эйгэҕэ көхтөөхтүк кыттаҕыт, дириҥ өйгүт, эппиэтинэстээх сыһыаҥҥыт уонна үрдүк сатабылгыт бастыҥ холобур буолар. Ханнык да үлэни ылыстаргыт, дьахтар аймах ураты кичэллээх сыһыанынан өрүү үтүө суобастаахтык толорулларыгар бигэ эрэллээхпин. Биһиги уһук хоту сирбит кэрэ аҥардара үлэҕэ эппиэтинэстээх сыһыаҥҥытынан, ураты күүстээх санааҕытынан, киэҥ көҕүскүтүнэн улууспут социальнай — экэнэмиичэскэй сайдыытын түстэһэҕит. Айылҕаттан амарах сыһыаҥҥыт, оҕолоргут уонна чугас дьоҥҥут тустарыгар сыралаах кыһамньыгыт, бэриниилээх тапталгыт, үтүө суобастаах үлэҕит, сүбэҕит-амаҕыт — биһиэхэ эр дьоҥҥо ыытыллар тэрээһиннэргэ күүс-көмө, араҥаччы буолар. Бу сырдык, кэрэ бырааһынньык сандал саас саҕаланыытын, күн уһуурун, айылҕа сэргэхсийэрин кытта сөп түбэһэринэн ураты суолталаах. Сир үрдүгэр таптал, кэрэ иэйии дьахтары кытта дьүөрэлии. Ийэ, кэргэн, кыыс оҕо – киһиэхэ саамай күндү, саамай тапталлаах дьоннор. Дьахтар тулуура-дьулуура орто дойдуга или-эйэни, үтүөнү-кэрэни сайар, уопсастыбаны түмэр, ситимниир. Түбүктээх үлэҕит түмүктээх буоллун, сыралаах сырыыгыт сыаналаах буоллун, ылсыбыккыт ыпсан истин, туруорбут соруккут туолан истин! Чөл, чэгиэн сылдьыҥ, дьиэ кэргэҥҥит бөҕө туруктаах буоллун. Кэлэр кэскилгит кэрэ, уйгулаах олоххут уһун буоллун! Дьолу-соргуну, муҥура суох тапталы, сылаас мичээргит, сайаҕас сыһыаҥҥыт тулаҕытыгар сырдыгынан сыдьаайа сырыттын! Или-эйэни! Эбээн-Бытантай национальнай улууһун Аҕа баһылыга И.Н. Стручков