1-КЫ НААХАРА НЭҺИЛИЭГЭР ҮРҮҤ ТУНАХ ЫҺЫАХ ТЭРЭЭҺИННЭЭХТИК ААСТА — 19 июня 2026 г. в 09:59:00.118
1-КЫ НААХАРА НЭҺИЛИЭГЭР ҮРҮҤ ТУНАХ ЫҺЫАХ ТЭРЭЭҺИННЭЭХТИК ААСТА Бэс ыйын 19 күнүгэр, 1-кы Наахара нэһилиэгэр, Арассыыйаҕа норуоттар сомоҕолоһууларын, Саха Өрөспүүбүлүкэтигэр Култуура, Мэҥэ Хаҥалас улууһугар Олохтоох бэйэ оҥорон таһаарыы сылларыгар аналлаах “Уйгу-быйаҥ ыһыаҕы айхаллыы көрсүөҕүҥ!” Үрүҥ Тунах Ыһыах ыытылынна. Ыһыах үөрүүлээх арыллыытын сиэрэ-туома үгэс быһыытынан алгыстан саҕаланна. Алгысчыт Аар Айыылартан көрдөһөн, арчылаан, сири-дойдуну аһатан, мустубут дьоҥҥо үтүөнү-кэрэни баҕарда. Үөрүүлээх тэрээһиҥҥэ улуус баһылыга Дмитрий Тихонов мустубут дьону-сэргэни күүтүүлээх ыһыах күнүнэн истиҥник эҕэрдэлээтэ, үтүө үлэһит дьоҥҥо наҕараадалары туттарда. Салгыы түһүлгэни биир тыыҥҥа киллэрэр оһуохай дьиэрэйдэ. Үөрүүлээх чааска нэһилиэк бастыҥ талааннахтарын эҕэрдэ кэнсиэрэ мустубут дьон сүргэтин көтөхтө. Онтон “Түһүлгэлээн олорон түөрэхпитин түстүөҕүҥ!” диэн бары бииргэ түһүлгэҕэ аһаан-сиэн, алтыһан, сэһэргэстилэр. Бу күн биир бэлиэ түгэнинэн тыа хаһаайыстыбатын сайдыытыгар сүҥкэн кылаатын киллэрбит сатабыллаах салайааччы Алексей Семенович Пахомов аатынан монумент үөрүүлээх арыллыыта буолла. Ыһыах үрдүк тэрээһиннээхтик ыытыллан, дьоҥҥо-сэргэҕэ үгүс үөрүүнү, күүһү-сэниэни бэлэхтээтэ. Мэҥэ Хаҥалас улууһун дьаһалтатын пресс-сулууспата