НӨӨРҮКТЭЭЙИ НЭҺИЛИЭГЭР ОҔО КУЛТУУРУНАЙ-СЫРДАТАР КИИНЭ АРЫЛЫННА
НӨӨРҮКТЭЭЙИ НЭҺИЛИЭГЭР ОҔО КУЛТУУРУНАЙ-СЫРДАТАР КИИНЭ АРЫЛЫННА Бүгүн Нөөрүктээйи нэһилиэгэр "Айылгы" норуот айымньытын киинин уораҕайыгар “Дьиэ кэргэн” федеральнай национальнай бырайыак көмөтүнэн оҥоһуллубут оҕо-ыччат култуурунай-сырдатар, иитэр-сайыннарар киинин арыллыытын өрөгөйдөөх күнэ үүннэ. Дойду бэрэсидьиэнэ Владимир Путин көҕүлээбит национальнай бырайыактара кэнчээри ыччаты сырдыкка, кэрэҕэ, көхтөөх олоххо көҕүлүүллэр. Тыа сириттэн саҕалаан улахан куораттарга тиийэ дьон олорор, сайдар усулуобуйаларын тупсарар, чэпчэтэр сыаллаах үгүс үлэ ыытыллар. 2025 сыл тохсунньу 1 күнүттэн «Култуура» национальнай бырайыак «Дьиэ кэргэн» диэн ааттанан үлэлиир. Ол чэрчитинэн «Дьиэ кэргэн сыаннастара уонна култуура инфраструктурата» эрэгийиэннээҕи бырайыагынан, култуура дьиэлэригэр олоҕуран оҕо-ыччат култуурунай-сырдатар кииннэрэ үлэҕэ киирэн саҕалаатылар. Маннык киин кэнчээри ыччакка айар-тутар дьоҕурдарын сайыннарыыга, сынньалаҥнарын туһалаахтык атаарыыга, сөбүлүүр дьарыктарын талан, саҥа сүүрээннэри арыйалларыгар туһуланар. Биир бастакынан Саха Өрөспүүбүлүкэтигэр маннык киин Нөөрүктээйи нэһилиэгэр “Айылгы” норуот айымньытын киинигэр арылынна. Үөрүүлээх тэрээһиҥҥэ Саха Өрөспүүбүлүкэтин култууратын уонна духуобунай сайдыытын министиэристибэтин муниципальнай тэриллиилэри кытары үлэ отделын салайааччыта Вера Моисеева, Мэҥэ Хаҥалас улууһун баһылыгын инфраструктураҕа уонна ОДьКХ боппуруостарыгар солбуйааччы Василий Филиппов, улуус култууратын уонна духуобунай сайдыытын салалтатын салайааччытын солбуйааччы Александр Кулешов, Өрөспүүбүлүкэтээҕи Норуот айымньытын дьиэтин сүрүн исписэлииһэ Дария Петрова, "Нөөрүктээйи нэһилиэгэ” тыа сирин түөлбэтин баһылыга Иван Старостин кыттыыны ылан, истиҥ эҕэрдэлэрин тиэртилэр. Саҥа арыллыбыт киин үлэтэ таһаарыылаах буоллун! Мэҥэ Хаҥалас улууһун дьаһалтатын пресс-сулууспата