🏡Мэҥэ Хаҥаласка социальнай гаастааһын бырагыраама үлэтэ көдьүүстээхтик барар
🏡Мэҥэ Хаҥаласка социальнай гаастааһын бырагыраама үлэтэ көдьүүстээхтик барар РФ Бырабыыталыстыбатын уурааҕынан быйылгы сылга социальнай гаастааһын бырагырааматынан Мэҥэ Хаҥалас улууһугар уопсайа 128 дьиэҕэ гаас утаҕа тардыллыахтаах. Былаан быһыытынан улууска күн бүгүн 48 ыалга гаас тардыллыбыт, онтон 10 ыалга күөх төлөн холбоммут. Улуус киинигэр Аллараа Бэстээххэ, Майаҕа, Ходоро, Бастакы Тыыллыма уонна Баатара нэһилиэктэригэр гаастааһын үлэтэ ыытыллар. Социальнай гаастааһын бырагырааматынан быйылгы сылга ордук Аллараа Бэстээххэ уонна Майаҕа баар саҥа кыбаарталларга гаас ситимин тардыыга көдьүүстээх үлэ ыытыллар. Майаҕа Маамыкаан кыбаарталыгар икки уулуссаҕа гаас ситимин тардыытын үлэтэ тэтимнээхтик барар. Социальнай гаастааһын бырагыраамата күн бүгүн икки хайысханан үлэлиир. Ол курдук, 2010 сыллаахтан СӨ Бырабыыталыстыбатын 104-үс нүөмэрдээх уурааҕар олоҕурбут 150 тыһыынча солк. суумаҕа диэри субсидиянан туһаныы, онтон 186-ыс нүөмэрдээх уурааҕынан бигэргэммит комплекснай гаастааһын бырагыраамата 2026 сыллаахтан олоххо киирэн үлэлиир. Комплекснай гаастааһын бырагыраама көмөтүнэн биир бастакынан анал байыаннай дьайыы кыттыылаахтарын дьиэ кэргэттэрэ, элбэх оҕолоохтор, маҥнайгы группалаах инбэлииттэр, инбэлиит оҕолоохтор уонна кыра дохуоттаах ыаллар туһаныахтарын сөп. Быйылгы сылга бу этиллибит материальнай көмөнөн улууска уопсайа 17 ыал туһаныаҕа. Онон гаастааһын үлэтэ тэтимнээхтик ыытыллан, дьон-сэргэ сана дьиэлэри хото туттаннар, быйыл дьиэлэригэр күөх төлөнү холботуохтара.