УЛУУ ТУЙМААДА ХОЧОТУГАР ҮРҮҤ ТУНАХ ЫҺЫАХ
УЛУУ ТУЙМААДА ХОЧОТУГАР ҮРҮҤ ТУНАХ ЫҺЫАХ Бэс ыйын 27-28 күннэригэр Үс Хатыҥ сиригэр-уотугар Туймаада хочотун Үрүҥ Тунах ыһыаҕар улууспут үтүө түһүлгэтэ тэрилиннэ. Кэрэ-бэлиэ күн улуус баһылыга Дмитрий Тихонов, улуус дьокутааттарын Сэбиэтин бэрэссэдээтэлэ Иннокентий Андросов, улуус баһылыгын бастакы солбуйааччы Гаврил Толстяков, инфраструктура уонна ОДьКХ боппуруостарыгар солбуйааччы Василий Филиппов, нэһилиэнньэ олоҕун-дьаһагын хааччыйыыга солбуйааччы Николай Никифоров, дьаһалта үлэһиттэрэ буолан Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылларыгар анаммыт Үрүҥ Тунах ыһыах үөрүүлээх арыллыытыгар кыттыыны ыллылар, улууспут түһүлгэтигэр ыраахтан-чугастан кэлбит биир дойдулаахтарбытын, күндү ыалдьыттарбытын кытта көрүстүлэр. Ыһыах чэрчитинэн «Туймаада Куо-2026» кэрэ уонна талаан куоҥкуруһар 12 кыттааччыттан Ванесса Максимова кыайыылаах буолан «Мисс и миссис Азия Россия» куоҥкуруска кыттар чиэскэ тигистэ. Биир дойдулаахпыт, Наахараттан төрүттээх бөҕөс Руслан Слепцов Дыгын Оонньууларыгар 400 миэтирэҕэ сүүрүү түһүмэҕэр кыайыылаах буолла. Уустар түһүлгэлэригэр "Бастыҥ хотохоон" күрэҕэр сатабыллаах маастарбыт Радион Шарин 2 миэстэ. "Дуорай кылыһахтаах тойугум" добун тойук күрэҕэр Дьабыыл нэһилиэгиттэн Денис Оконешников Кылаан Чыпчаал аат кыайыылааҕыган буолла. Ыһыах үтүө түһүлгэтэ биир дойдулаахтарбытын, ыраахтан-чугастан кэлбит күндү ыалдьыттарбытын түмтэ. Күндү дьоммут атах тэпсэн олорон ирэ-хоро сэһэргэһэн, санааларын атастаһан, алгыс тылларын иҥэринэн, илии илииттэн ылсаннар киэҥ түһүлгэни тэрийэн оһуохайдаан, астынан тарҕастылар. Ыһыах алгыһа үрдүк ситиһиилэргэ кынаттаатын, үтүөнү-кэрэни түстээтин! Ил-эйэ эҥээрдэстин! Дьол-соргутосхойдун! Үрүҥ Тунах ыһыаҕынан! Мэҥэ Хаҥалас улууһун дьаһалтатын пресс-сулууспата