ЫАННЬЫКСЫТТАРГА, ОТЧУТТАРГА ЫРЫА КЭҺИИЛЭЭХ "АЙАР АЙАН" САҔАЛАННА — 8 июля 2026 г. в 03:45:04.224
ЫАННЬЫКСЫТТАРГА, ОТЧУТТАРГА ЫРЫА КЭҺИИЛЭЭХ "АЙАР АЙАН" САҔАЛАННА "Алааһым арылы кустуга" диэн ааттаах "Айар айан" бырайыак, Дойду үрдүнэн норуоттар сомоҕолоһууларын, Саха сиригэр култуура, Мэҥэ Хаҥалас улууһугар олохтоох оҥорон таһаарыы сылларыгар туһуламмыт, үһүс сылын саҕаланна. Быйыл Мэҥэ Хаҥалас, Уус-Алдан, Амма улуустарынан алгыстаах айана бэлиэтэннэ. Бырайыак быйыл үрдүк категориялаах терапевт-быраас, мэдиссиинэ билимин хандьыдаата, мелодист, ырыаһыт, РФ суруналыыстарын сойууһун чилиэнэ Виталий Тимофеевич Андросов төрөөбүтэ 75 сылыгар ананар. Айар бөлөххө Саха Өрөспүүбүлүкэтин үтүөлээх, норуодунай артыыстара Григорий Петров, Александр Емельянов, СР култууратын туйгуннара Георгий Попов, Рустам Слепцов, Надежда Захарова, Прокопий Федоров, Спиридон Григорьев - Илгэлээх Испирдиэн курдук уус-уран искусство маастардара киирэллэр. Бастакы кэнсиэртэр Доллу, Мөҥүрүөн, Өлтөх нэһилиэктэригэр үрдүк таһымҥа ыытыллан, тыа сирин дьонун-сэргэтин астыннардылар. Култуура сылыгар тыа сирин үлэһиттэригэр өссө 8 сиргэ босхо кэнсиэрдэр ыытыллыахтара: От ыйын 8 күнүгэр: • 12:00 ч. Хорообут нэһилиэгэ. Хорообут ХЭТ "Харыйалаах" сайылыга. • 15:00 ч. 1-кы Баатара нэһилиэгэ. В.В. Ноев аатынан култуура киинэ. • 17:00 ч. Дьаҥхаады нэһилиэгэ. "Долоон" сайылык. От ыйын 9 күнүгэр: • 12:00 ч. Амма улууһун Сатаҕай нэһилиэгэ. "Оһох" сайылык. • 15:00 ч. Тараҕай нэһилиэгэ. "Лампа" сайылык. • 17:00 ч. Моорук нэһилиэгэ. Т.К. Апросимова аатынан култуура киинэ. Бу күн СР култууратын уонна духуобунай сайдыытын Миниистирэ Афанасий Иванович Ноев сылдьыаҕа. От ыйын 10 күнүгэр: • 12:00 ч. 3-с Мэлдьэхси нэһилиэгэ. Сынньалаҥ паарката. • 17:00 ч. Дьаҥхаады нэһилиэгэ. "Маандай". Айар айанньыттар халлаан туран биэрэн, бары былааннаммыт сирдэригэр тиийэн, "Алааһым арылы кустуга" кэнсиэр кэрэхсэбили ыла турдун диэн баҕараллар. Бырайыак салайааччыта, СР култууратын туйгуна, СР Ырыа айааччыларын сойууһун чилиэнэ Галия Сосина