МАЙА СЭЛИЭННЬЭТИГЭР КЫҺЫЛ ЗНАМЯНЫ КӨРСҮҮ ДЬОРО ТЭРЭЭҺИНЭ БУОЛЛА — 17 июля 2026 г. в 09:20:54.890
МАЙА СЭЛИЭННЬЭТИГЭР КЫҺЫЛ ЗНАМЯНЫ КӨРСҮҮ ДЬОРО ТЭРЭЭҺИНЭ БУОЛЛА Бүгүн, Майа сэлиэнньэтигэр «Кыайыы Аартыга» болуоссакка Саха Өрөспүүбүлүкэтин сэрии, тыыл уонна үлэ бэтэрээннэрин Сэбиэтин Кыһыл Знамятын көрүстүлэр. Бу түгэн 2027 сылга бэтэрээннэр Өрөспүүбүлүкэтээҕи сэбиэттэрэ тэриллибитэ 40 сылыгар аналлаах эстэпиэтэ чэрчитинэн ыытыллар. Знамя улууспутугар от ыйын 15 күнүттэн Уус Алдан улууһуттан кэлэн, Мөҥүрүөн, 1-кы Баатара нэһилиэктэринэн айаннаан, бүгүн Майаҕа кэллэ. Бу күннэргэ нэһилиэктэр бэтэрээннэрэ, олохтоохторо көхтөөхтүк кыттыыны ыллылар. Кыһыл Знамя көрсүһүүтүн улуустааҕы бэтэрээннэр сэбиэттэрин бэрэссэдээтэлэ Евдокия Решетникова салайан ыытта. Кини эстэпиэтэ сыалын-соругун, бэтэрээннэр уопсастыбаннай олоххо кылааттарын туһунан кэпсээтэ. Улуус баһылыгын нэһилиэнньэ олоҕун-дьаһаҕын хааччыйыыга солбуйааччы Николай Никифоров улуус салалтатын аатыттан кэлбит ыалдьыттары, бэтэрээннэри эҕэрдэлээн, бу дьоро тэрээһин улуус олоҕор улахан суолталааҕын бэлиэтээтэ. Улуус бэтэрээннэрин сүбэтин президиумун чилиэнэ, «Ытык сүбэ» салайааччыта Зиновий Игнатьев болуоссат устуоруйатын сырдатта. Кини «Кыайыы Аартыга» мемориальнай комплекс хайдах тутуллубутун, бу сир улуус дьоно-сэргэтэ сэрии сылын кэриэстэрин убаастабыллаахтык ахтар үтүө сирэ буоларын кэпсээтэ. Тэрээһин чэрчитинэн Роман Гаврильевич Васильев аатынан улуустааҕы кыраайы үөрэтэр түмэл методиһа Александр Эверстов бэтэрээннэр хамсааһыннарын устуоруйатын, 1987 сыллаахха Өрөспүүбүлэкэбитигэр бастакы сэбиэт тэриллибитин сырдатта. Кыһыл Знамя эстэпиэтэтэ салгыы от ыйын 20 күнүгэр Алтан нэһилиэгэр айанныыр, ол кэнниттэн Амма улууһугар бэриллэр. Мэҥэ Хаҥалас улууһун дьаһалтатын пресс-сулууспата