СОМОҔО СУБУОТУННЬУК
СОМОҔО СУБУОТУННЬУК Улуус дьаһалтатын көҕүлээһининэн Майа алааһыгар киэҥ ньуурдаах күрүөлээһин үлэтэ ыытылла турар. Субуотунньугу тэрийиигэ улуус баһылыгын нэһилиэнньэ олоҕун-дьаһаҕын хааччыйыыга солбуйааччы Николай Никифоров көхтөөхтүк кыттыыны ылан, үлэни былааннааһынтан саҕалаан түмүктээһиҥҥэ дылы салайан-көһүлээн ыытта. Субуотунньукка улуус дьаһалтатын үлэһиттэрэ, оройуон тэрилтэлэрин эр дьоно, МЧС үлэһиттэрэ уонна анал байыаннай дьайыыга кыттааччылар көхтөөхтүк кыттыыны ыллылар. Бары түмсэн, 8000 кэриҥэ сиэрдийэлээх 10 килэмиэтир сири күрүөлээһин сомоҕо үлэтигэр күүс-уохтарын уурдулар. Күрүөлэнэр сиргэ «Чүүйэ» тэрилтэ ходуһата уонна бааһыната киирэр. Хаһаайыстыба 400-тэн тахса сүөһүлээх, ол иһигэр 150 ыанар ынахтаах. Инникитин хаһаайыстыба бу сиргэ сүөһү эбии аһылыгын ыһар былааннаах. Маннык сомоҕо үлэлэрбит – биир санаа, биир сыаллаах түмсүүбүтүн, төрөөбүт сирбитин сайыннарарга баҕарар санаабытын көрдөрөр бэлиэлэрэ. Бары кыттыылаахтарга махталбытын тириэрдэбит! Мэҥэ Хаҥалас улууһун дьаһалтатын пресс-сулууспата