ТАТЬЯНА ЖИРКОВА ААТЫНАН ҮҺҮС ТӨГҮЛҮН ЫЫТЫЛЛАР МАЙАТААҔЫ МАРАФОН ПРЕСС-КОНФЕРЕНЦИЯТА БУОЛЛА
ТАТЬЯНА ЖИРКОВА ААТЫНАН ҮҺҮС ТӨГҮЛҮН ЫЫТЫЛЛАР МАЙАТААҔЫ МАРАФОН ПРЕСС-КОНФЕРЕНЦИЯТА БУОЛЛА Бүгүн, атырдьах ыйын 6 күнүгэр Майа сэлиэнньэтигэр үһүс төгүлүн ыытыллар аан дойду, Европа чөмпүйүөнэ, Арассыыйа успуордун үтүөлээх маастара, Арассыыйа уонна СӨ физическэй култууратын уонна успуордун туйгуна Татьяна Жиркова аатынан Майатааҕы марафонҥа анаммыт пресс-конференция буолла. Ол курдук, пресс-конференцияҕа үп миниистирэ Иван Алексеев ситим нөҥүө быһа холбонон эҕэрдэ тылын эттэ, марафоҥҥа кыттыыны ыларын туоһулаата. Улуус баһылыга Дмитрий Тихонов, Майа сэлиэнньэтин баһылыга Алексей Неустроев, СӨ үп министиэристибэтин көҕүлүүр бүддьүөт салаатын салайааччыта Светлана Колодезникова марафон улуус олоҕор туһалааҕын уонна көдьүүстээҕин бэлиэтээтилэр. Салгыы «Maya.RUN» сүүрүүктэр түмсүүлэрин салайааччыта, улуустааҕы киин балыыһа нарколог-бырааһа, Майатааҕы марафон тэрийээччитэ Александра Мохначевская тэрээһин хаамыытын сырдатта уонна марафон туһунан сиһилии билиһиннэрдэ. Майатааҕы марафон сыл аайы кэҥээн, дьону-сэргэни тардан иһэр, элбэх улуус холобур оҥостор. Ол курдук, 2024 сыл атырдьах ыйын 18 күнүгэр 300 слот атыыламмыта. 2025 сыл атырдьах ыйын 17 күнүгэр 500 слот атыыламмыта. Быйыл, 2026 сыл атырдьах ыйын 22 күнүгэр буолаары турар сүүрүүгэ уопсайа 700 слот атыыга тахсан турар. Пресс-конференция түмүгэр Татьяна Жиркова бу улахан тэрээһин спорт эйгэтигэр улахан суолталааҕын, элбэх үтүө өрүттээҕин бэлиэтээтэ. Кэлбит ыалдьыттарга, тэрийээччилэргэ, бары сүүрүүнү өйүүр дьөҥҥө, чөл олоҕу тарҕатааччыларга махтанна, ситиһиилэри баҕарда. Мэҥэ Хаҥалас улууһун дьаһалтатын пресс-сулууспата