ҮӨРЭХ ҮЛЭҺИТТЭРИН БАЛАҔАН ЫЙЫНААҔЫ СҮБЭ МУННЬАҔА
ҮӨРЭХ ҮЛЭҺИТТЭРИН БАЛАҔАН ЫЙЫНААҔЫ СҮБЭ МУННЬАҔА Балаҕан ыйын 9-10 күннэригэр Майа сэлиэнньэтигэр Мэҥэ Хаҥалас улууһун үөрэҕин үлэһиттэрин "Үөрэҕирии - түөлбэ сайдыытын төрдө" диэн ааттаах үгэс буолбут балаҕан ыйынааҕы сүбэ мунньаҕа ыытылынна. Икки күн устата учууталлар, иитээччилэр, оскуола уонна уһуйаан салайааччылара, ону тэҥэ өрөспүүбүлүкэ таһымнаах ыҥырыылаах эспиэрдэр үөрэхтээһин сайдыытын сүрүн хайысхаларын, иитии саҥа ньымаларын, сыыппара технологиятын киллэриини уонна идэҕэ туһаайыыны дьүүллэстилэр. Бастакы күн соруктарга уонна аныгы үөрэх быраактыкаларыгар ананна. Сүрүн мунньахха улуус үөрэҕин тиһигин сайдыытын туһунан дакылааттары Саха өрөспүүбүлүкэтин үөрэҕириитин уонна билимин миниистирэ Нюргуна Соколова, улуус баһылыга Дмитрий Тихонов, улуустааҕы үөрэх салалтатын салайааччы Ирина Плотникова иһитиннэрдилэр уонна саҥа үөрэх дьылыгар соруктары туруордулар. Бастыҥ үлэлээх учууталларга, уһуйааччыларга араас таһымнаах наҕараадалары туттардылар. Үлэ түөрт сүрүн хайысханан тэрилиннэ: • «Саҥаны бил»: математическай грамотность, дьоҕурдаах оҕолору кытта үлэ уонна оскуола үөрэҕин утумнааһын соруктарыгар ананна. Методическай олимпиадалар, панельнай дискуссиялар уонна стратегическай сессиялар ыытылыннылар. • «Оҥор»: айар бырайыактары уонна граҥҥа хапсар кыаҕы дьүүллэстилэр. Учууталлар үөрэхтээһиҥҥэ урбаан холобурдарын кытта билистилэр. • «Сайыннар»: дойдуга бэриниилээх буолуу иитиигэр ананна. Улуус оскуолаларын хамаандалара нэһилиэк сиригэр-уотугар туристическай маршруттар бырайыактарын көрдөрдүлэр. • «Бииргэ үлэлэс»: медиа, тыл-өс дьоҕуругар уонна төрөппүттэри кытта үлэҕэ уопут атастастылар. Араатардар куонкурустара, үөрэхтээһиҥҥэ искусственнай интеллеги туһаныы, саахымат уонна илиинэн оҥоһук маастар-кылаастара ыытылыннылар. Дьоро түгэнинэн "Урожай-2026" дьаарбаҥка буолла. Сүбэ мунньах иккис күнэ Майаҕа Ф.Г.Охлопков аатынан орто оскуолаҕа ыытылынна. Салайааччыларга аналлаах "Иитии, доруобуйа, уйулҕа" диэн панельнай дискуссияҕа иитии уонна чэбдигирдэр эйгэни тэрийии туһунан кэпсээтилэр. Мунньахха этиллибит соруктар, этиилэр 2026–2027 үөрэх дьылыгар улуус үөрэҕин сайдыытыгар төһүү күүс буолуохтара. Хаартыскалары бу сигэнэн көрүҥ: https://drive.google.com/drive/folders/1Yr78GGlqpwtuLoXDAsOqCroK0nKzsY5C?usp=drive_link Мэҥэ Хаҥалас улууһун дьаһалтатын пресс-сулууспата