Ытыктабыллаах биир дойдулаахтарым!
Ытыктабыллаах биир дойдулаахтарым! Быыбар боротокуолун 97,3%-нын аахтылар. Биир мандаттаах уокурукка куолас 37,31%-нын ылан, Петр Шамаев бастаан иһэр. Оттон “Ньыгыл Арассыыйа” баартыйа 43,35%-нын ылла. Сахабыт сирин олохтоохторун, быыбардааччылары учаастактарга тиийэн, дойдубут, өрөспүүбүлүкэбит дьылҕата быһаарыллар, кэскилэ түстэнэр түгэнигэр туора турбакка куоластаабыккытыгар, санааҕытын эппиккитигэр махтанабын! Бу биһиги, саха дьоно-сэргэтэ, олоххо көхтөөх көрүүлээхпитин, өрөспүүбүлүкэбит кэскилэ барыбытын долгутарын туоһута буолар. Биир мандааттаах уокурукка барыллаан ааҕыынан Петр Шамаев кэннэ иккис миэстэҕэ Федет Тумусов (17,10%), үһүскэ – Ньургуйаана Заморщикова (14,84%), төрдүскэ – Айаан Васильев (12,47%), бэһискэ – Анатолий Ноговицын (6,39%) таҕыстылар. Оттон баартыйаларга “Ньыгыл Арассыыйа” (43,35%) кэннэ КПРФ (25,52%), “Саҥа дьон” (11,21%), “Сиэрдээх Арассыыйа (7,35%) уонна ЛДПР (5,74%) буоллулар. Аны куолас мантан улаханнык уларыйбата буолуо. Онон хорсун буойун, бэйэбит курдук тыа уола Петр Шамаевка, баартыйа испииһэгинэн барар, уопуттаах бэлиитик, салайааччы Галина Данчиковаҕа уонна кэскиллээх бэйэбит ыччаппыт Василий Егоровка истиҥ эҕэрдэбин тиэрдэбин. Бүгүн төрөөбүт-үөскээбит Мэҥэ Хаҥалаһым дьонуттан ордук үөрдүм. Биһиги улууска 24 тыһыынчаттан тахса быыбардааччы баар. Тыа улуустарыттан саамай улаханнарабыт, саамай элбэх куоластааччылаахпыт. Олортон 59,80%-нара баартыйа иһин куоластарын “Ньыгыл Арассыыйаҕа”, оттон биир мандааттаахха 52%-тан тахса киһи Петр Шамаевка биэрдэ. Бу – өбүгэһэ үгэһин тутан, ынах-сүөһү иитэн, тыа хаһаайыстабатынан дьарыктанан олорор улуустарга – бастыҥ көрдөрүү! Ол аата Мэҥэм дьоно салайан олорор баартыйабыт ыытар бэлиитикэтин биһириир, үлэ көдьүүстээҕин илэ-чахчы билэр, эрэнэр эбиттэр. Онтон атын буолуон сатаммат! Киэн туттабын, ис сүрэхпиттэн махтанабын! Кырдьык, биһиги хас биирдиибит туспа, ураты көрүүлээх, санаабыт-талыыбыт атын. Ол – хас биирдии киһи Төрүт сокуонунан мэктиэлэнэр үтүө көҥүлэ. Ол гынан баран, биһигини барыбытын дойдубут уонна үүнэр ыччаппыт сырдык, үтүө, дьоһуннаах кэскилэ сомоҕолуурун мин бигэтик билэбин. Биһиги – биирбит – дойдубут, дьоммут-сэргэбит туһугар. Быыбар – быыбарынан. Буолан ааста, түмүктэннэ. Оттон үлэ-хамнас саҥа кэрдииһэ торумнанан, саҥа сайдыы былаана оҥоһулунна. Ол аата биһигини иннибитигэр өссө күүстээх үлэ күүтэр, саҥа соруктар тураллар: тыабыт сиригэр саҥа уһуйааннар-оскуолалар, балыыһалар-дьиэлэр, суол-иис, социальнай инфраструктура тутуллуо, национальнай бырайыактарбыт, сайдыыбыт тосхоллоро олоххо киириэхтэрэ. Онон бука бары көхтөөх гражданскай позицияларын көрдөрбүт бар дьоммор махтанан туран, аны өрөспүүбүлүкэбит, дойдубут сарсыҥҥытын туһугар түмсэн, бу уустук кэмҥэ сомоҕолоһон бииргэ үлэлиэх, айыах-тутуох, дьоллоох олоҕу бииргэ түстүөх диэн ыҥырабын!