Күндү сахам дьоно!
Күндү сахам дьоно! Бүгүҥҥүттэн үс күннээх Судаарыстыбаннай Дуума дьокутааттарын талар быыбарбыт саҕаланна. Саха сирин интэриэһин Москубаҕа ким туруорсара, көмүскүүрэ, дойдубут үрдүкү салалтатыгар тылбытын тиэрдэрэ биһигиттэн бэйэбититтэн тутулуктаах. Бэйэ дьокутаата диэн - бүлүтүөҥҥэ суруллар көннөрү араспаанньа буолбатах. Бу өрөспүүбүлүкэбитигэр тыын суолталаах боппуруостары федеральнай таһымҥа туруулаһар киһи: электроэнергия тарыыбын, хотугу улуустарга таһаҕас тиэллэр ороскуотун үбүлээһини, Өлүөнэ эбэни туоруур муостабыт, суолбут-ииспит тутуутун, социальнай эбийиэктэрбит өрөмүөннэрин, тутуллууларын, тыа сирин бүттүүн сайдыытын, о.д.а. Саха сириттэн биир мандааттаах уокуруктан биир уонна партия испииһэгинэн дьокутааттар талыллыахтара. Онон мин уонна эн, биһиги куоласпыт Госдумаҕа эмиэ иһиллэн өрөспүүбүлүкэбит сайдыытын түстэһэрин туһугар, быыбарга тахсыаҕыҥ! Бу күннэргэ киэҥ нэлэмэн Сахабыт сирин үрдүнэн 16 быстах кэмнээх уонна 784 постояннай учаастак арыллан үлэлии турар. Дьон сарсыарда 8 чаастан номнуо куоластаан эрэр. Быыбар үс күн - балаҕан ыйын 18-19-20 күннэригэр - ыытыллар. Онон күннээҕи түбүккэ үтүрүйтүрэн өрөспүүбүлүкэбитигэр уонна дойдубутугар биир саамай суолталаах, дьылҕабытын, кэскилбитин түстэһэр эппиэтинэстээх күнү, көтүтүмэҥ. Мин тыа сиригэр кыра нэһиэлиэккэ улааппытым. Оттон оччолорго дэриэбинэҕэ быыбар күнэ дьиҥнээх норуот бырааһынньыга буолара. Дьон сарсыардаттан сүргэтэ көтөҕүллэн, үөрэн-көтөн кулуупка, хонтуораҕа тиийэн көхтөөх кыттыыны ылара. Онон быыбар күнэ миэхэ мэлдьи, күн бүгүн даҕаны, туох эрэ үтүөнү, сырдыгы уонна саамай сүрүнэ инникигэ эрэли кытта ситимнээх. Биһиги көлүөнэ дьоҥҥо барыбытыгар даҕаны оннук буолуо. Онон, доҕоттор, биһиги куоласпыт Өрөспүүбүлүкэбит кэскилэ буоларын умнумуох! Бука бары - быыбарга! Бука бары ДОЙДУБУТ ТУҺУГАР✅