С.З. БОРИСОВ ААТЫНАН ТЫЫЛЛЫМА ОРТО ОСКУОЛАТЫН 110 СЫЛЛААХ ҮБҮЛҮӨЙЭ
С.З. БОРИСОВ ААТЫНАН ТЫЫЛЛЫМА ОРТО ОСКУОЛАТЫН 110 СЫЛЛААХ ҮБҮЛҮӨЙЭ Бүгүн кэм-кэрдии хаамыыта тохтоон, ааспыты ахтан-санаан, билиҥҥини уруйдаан, кэлэри кэрэһилээн ылар күн үүннэ. Ол курдук, үс бэлиэ даата бииргэ дьүөрэлэстэ: Тыыллыма орто оскуолата 110 сыллаах өрөгөйдөөх үбүлүөйэ, уһулуччулаах биир дойдулаахпыт, өрөспүүбүлүкэни салайбыт Семен Захарович Борисов төрөөбүтэ 115 сыла уонна кини аата бу үөрэх кыһатыгар иҥэриллибитэ 25 сыла бэлиэтэнэр. Бу күн оскуола барахсан бэйэтин устуоруйатын, ситиһиилэрин туһунан ыалдьыттарын, махталлаах үөрэнээччилэрин кытта үөрүүнэн үллэһиннэ. Оскуола үбүлүөйэ сиэртэн-туомтан, оскуола устун экскурсияттан, быыстапкалары көрүүттэн саҕаланна. Салгыы «Олох үөһүгэр» диэн ааттаах истиҥ кылаас чаастара ыытыллан, араас кэмнэргэ үөрэммит выпускниктар уонна билиҥҥи үөрэнээччилэр биир тыынынан алтыстылар. Тэрээһин үөрүүлээх чааһа 1916 сыллаахха Манньыаттаах Уола маҥнайгы оскуоланы аспыт кэмиттэн көрдөрөр туруоруунан саҕаланна. Ыҥырыылаах ыалдьыттар - Мэҥэ Хаҥалас улууһун баһылыгын инфраструктура уонна ОДьКХ боппуруостарыгар солбуйааччы Василий Филиппов, Саха Өрөспүүбүлүкэтин Бырабыыталыстыбатын бэрэссэдээтэлин көмөлөһөөччүтэ, Тыыллыма нэһилиэгин попечителлэрин сэбиэтин бэрэссэдээтэлин солбуйааччы Саргылана Леонтьева, “Саха” национальнай көрдөрөр-иһитиннэрэр хампаанньа генеральнай дириэктэрэ Олег Марков, улуус үөрэҕин салалтатын салайааччы Ирина Плотникова, улуус хапытаалынай тутуу салалтатын салайааччытын солбуйааччы Сахайаана Сергучева, нэһилиэк баһылыга Руслан Афанасьев үбүлүөйүнэн эҕэрдэлээн туран, наҕараадалары туттардылар. Оскуола киэн туттар выпускниктара, билигин норуокка биллэр дьон — Иван Ксенофонтов-Силиги, Галина Попова-Санаайа, ону сэргэ, оскуола бастакы выпускниктарын аатыттан Марианна Осипова — истиҥ ахтыы, махтал тылларын анаатылар. Кинилэр тыллара сүрэҕи долгутан, оҕо саас сырдык кэмнэрин санаттылар. Ол кэннэ үгэс буолбут выпускниктар параадтара буолла. Киэһэни кэнсиэр, үҥкүү-битии, «Ааспыт кэм ахтылҕана» диэн ааттаах дьоро киэһэ салҕаата. Тыыллыма оскуолатын бары учууталларын, үөрэнээччилэрин, үлэһиттэрин, бэтэрээннэрин 110 сыллаах үбүлүөйүнэн итиитик-истиҥник эҕэрдэлиибит! Үөрэхпит кыһата өссө да сайда, чэчирии, үүнэр көлүөнэҕэ сырдыгы саҕа турдун! Мэҥэ Хаҥалас улууһун дьаһалтатын пресс-сулууспата