МАСАХА МЭХЭЭС "КЭРЭХСЭБИЛЛЭЭХ ЧАХЧЫЛАР" КИНИГЭТИН СҮРЭХТЭНИИТЭ
МАСАХА МЭХЭЭС "КЭРЭХСЭБИЛЛЭЭХ ЧАХЧЫЛАР" КИНИГЭТИН СҮРЭХТЭНИИТЭ Бүгүн улуустааҕы кыраайы үөрэтэр түмэлгэ улууспут биир киэн туттар ыччата, устуоруйаны сырдатааччы, тыа хаһаайыстыбатыгар дьону көҕүлээччи, оройуон дьокутаата уонна урбаанньыт Михаил Иванович Масаха — бар дьонугар биллэринэн Масаха Мэхээс — «Кэрэхсэбиллээх чахчылар» диэн маҥнайгы кинигэтин сүрэхтиир үөрүүлээх түгэнэ тосхойдо. Саҥа бэчээттэнэн тахсыбыт хомуурунньукка ааптар олоххо буолбут 23 араас интэриэһинэй, дьикти түгэни ылсан, кырдьыктаах докумуоннарга, чахчыларга олоҕуран, олус тиийимтиэтик, кылгастык уонна умсугутуулаахтык тиэрдибит. Кинигэ ааҕааччыга устуоруйаны саҥалыы хараҕынан көрөргө, бэйэ дойдутун дьонун үтүө аатын тилиннэрэргэ ананар. Эҕэрдэ тыл маанытын, алгыс бастыҥын тустаахха анаан, мустубут дьон үөрэ-көтө ууннулар: Улуус дьокутааттарын Сэбиэтин бэрэссэдээтэлэ Иннокентий Андросов, култуура салалтатын салайааччыта Данил Осипов, социальнай бэлиитикэ салалтатын салайааччыта Октябрина Кулешова, кыраайы үөрэтэр түмэл исписэлииһэ Михаил Трифонов, Ытык Сүбэ салайааччыта Зиновий Игнатьев, история биридимиэтигэр учуутала Татьяна Сидорова, Майа сэлиэнньэтин дьаһалтатын баһылыгын солбуйааччы Дмитрий Игнатьев, киин бибилэтиэкэ салайааччыта Марианна Никанорова. Ордук долгутуулаах түгэнинэн чугас дьонун — ийэтин, эдьиийин, кэргэнин истиҥ-иһирэх эҕэрдэлэрэ, кини айар үлэтигэр эрэл, таптал тыллара буоллулар. Масаха Мэхээс «Кэрэхсэбиллээх чахчылар» — кинигэтэ бүтүн норуот устуоруйатын, үгэстэрин үйэтитиигэ дьоһуннаах кылаат, кэлэр көлүөнэҕэ хаалар бэртээхэй бэлэх. Мэҥэ Хаҥалас улууһун дьаһалтатын пресс-сулууспата