Бүгүн, алтынньы 15 күнүгэр, Майа сэлиэнньэтигэр «Тупсаҕай куорат эйгэтин тэрийии» федер...
Бүгүн, алтынньы 15 күнүгэр, Майа сэлиэнньэтигэр «Тупсаҕай куорат эйгэтин тэрийии» федеральнай бырагырааманан «Ытарҕалаах» бульвар Ⅰ түһүмэҕин үлэтин түмүгэ үөрүүлээх быһыыга арылынна. Кэрэ-бэлиэ күнүнэн улуус баһылыгын инфраструктураҕа уонна ОДьКХ боппуруостарыгар солбуйааччы Василий Филиппов, «Майа сэлиэнньэтэ» тыа сирин түөлбэтин баһылыгын бастакы солбуйааччы Дмитрий Игнатьев эҕэрдэлээтилэр, эбийиэги кэмигэр, саҥа олох ирдэбилигэр эппиэттиир гына тутан таһаарбыт хамаандаҕа, бырайыак олоххо киирэригэр күүс-көмө буолбут 15 волонтер оҕолорго наҕараадалары туттардылар. Тэрээһин түсчүт Зиновий Игнатьев алгыһы түһэриититтэн саҕаланна. Надежда Сергеева салайааччылаах «Уран Майа» иистэнньэҥнэр түмсүүлэрин, Ⅲ-с көлүөнэ оскуолатын далбар хотуттара бэйэ илиилэринэн тикпит мааны таҥастарын дефиле-муодалаан дьон-сэргэ сөҕүүтүн-махтайыытын ыллылар. Итиэннэ «Кэнчээри» уһуйаан «Току-току ньээм-ньээм» бөлөх иитиллээччилэрэ элбэх ырыа ааптара, мелодист Капиталина Семенова «Ытарҕалаах үрэх» диэн ырыатын толорон дьоро күнү киэргэттилэр. «Ытарҕалаах» бульвар атыы-эргиэн оройо, сирэ-уота буоларын туоһулуур үтүө тэрээһиҥҥэ эт-үүт, олохтоох бородууксуйа, бурдук аһа дэлэччи атыыланна. Майабыт сэлиэнньэтэ үүнэ-сайда турарын туһугар үлэлии-хамныы сылдьар туруу үлэһит дьоммутугар-сэргэбитигэр махтал бастыҥын аныыбыт! Майа олохтоох дьаһалтата