МУУСКА СЭРЭХТЭЭХ БУОЛУҤ!
МУУСКА СЭРЭХТЭЭХ БУОЛУҤ! Ситэ тоҥо илик чараас мууска киирии баччаларга кутталлааҕын киһи үксэ билэр. Ол эрээри сэрэҕи сүтэрэн, туох эрэ биричиинэттэн кыһарыйтаран араас быһылааннарга түбэһиэн сөп. Быһылаан тахсыбатын туһугар билигин муус тоҥуутугар бары сэрэхтээх буоларбыт ирдэнэр. Ытыктабыллаах улууспут олохтоохторо! Муус хаһан да биир тэҥ халыҥ буола тоҥмотун өйдүөхтээххит. Күөллэргэ хомус, талах үүммүт сиригэр уу бытааннык тоҥор. Муус хайа барбыт, чараас сирдэрэ хаар түстэҕинэ ордук кутталлаахтар, киһи хараҕар көстүбэт буолар. Хас биирдиибит бэйэбитигэр уонна чугас дьоммутугар эппиэтинэс ылынан сэрэтэр, өйдөтөр үлэни ыытыахтаахпыт. Күндү төрөппүттэр! Билиҥҥи кэмҥэ уу кытыытыгар, ситэ тоҥо илик чараас мууска чугаһыыр, киирэр кутталлааҕын оҕолоргутугар сэрэтэр үлэни ыытан өйдөтүҥ. Хайа да түгэҥҥэ уу түөлбэтин, өрүс аттыгар оонньуулларын көҥүллээбэккитигэр, кыра саастаах оҕолоргутун көрүүтэ суох хаалларымаҥ, хараххыт далыттан сүтэримэҥ. Сэрэхтээх буолуу быраабылатын тутуһуу хас биирдиибит куттала суох буолуутун мэктиэтэ буоларын умнумаҥ! Мэҥэ Хаҥалас улууһун дьаһалтатын пресс-сулууспата