В.И. ЛЕНИН ААТЫНАН СОПХУОС ТЫРАХТАРЫЫСТАРЫН ТУҺУНАН КИНИГЭ СҮРЭХТЭННЭ
В.И. ЛЕНИН ААТЫНАН СОПХУОС ТЫРАХТАРЫЫСТАРЫН ТУҺУНАН КИНИГЭ СҮРЭХТЭННЭ Бүгүн, алтынньы 15 күнүгэр, Нөөрүктээйи нэһилиэгэр В.И. Ленин аатынан сопхуос тырахтарыыстарын туһунан кинигэ сүрэхтэннэ. Бу таһаарыы — Мэҥэ Хаҥалас хоһуун тырахтарыыстарын үйэтитэр түөрт сиэрийэлээх улахан бырайыак төрдүс кинигэтэ. Бу үтүө дьыала олоххо киирэригэр көҕүлээччинэн, бырайыак ааптарынан Александр Эверстов буолар. Кини тула түмсүбүт улууспут кыраайы үөрэтээччилэрэ бу сыллар тухары түөрт туому бэчээттэтэн таһааран, улахан үлэни түмүктээтилэр. Бырайыак ааптардара «Ыччаттарбыт үлэлии үөрэнниннэр, үлэ дьонун холобурун батыстыннар, дойдуларын устуоруйатын биллиннэр, хорсун үлэлээх тырахтарыыстарбыт үйэ-саас тухары ааттанныннар» — диэн санаанан салайтаран үлэлээтилэр. Ленин аатынан сопхуос — бүтүн өрөспүүбүлүкэни оҕуруот аһынан хааччыйан олорбут, Сэбиэскэй кэм биир бөдөҥ, туруу үлэһиттэрдээх кэлэктиибэ этэ. Ол кэминээҕи бааһыналар өлгөм үүнүүлэрэ тырахтарыыстар илиилэрин иһинэн ааспыта. Кинилэр оҕуруот аһын олордууттан саҕалаан, уу кутууга, хомуйууга, тиэйиигэ-таһыыга тиийэ барытын оҥороллоро. Бүгүҥҥү үөрүүлээх тэрээһиҥҥэ — Карл Байкалов, Фёдор Попов, Максим Горькай, Владимир Ленин ааттарынан түөрт сопхуос бары бэрэстэбиитэллэрэ кэлбиттэрэ бу күн суолтатын өссө үрдэттэ. Ыҥырыылаах ыалдьыттар Мэҥэ Хаҥалас улууһун тыа хаһаайыстыбатын салаатын салайааччытын солбуйааччы Александр Борисов, Нөөрүктээйи нэһилиэгин тыа сирин түөлбэтин баһылыга Иван Старостин эҕэрдэлэрин тиэртилэр, махтал суруктары, наҕараадалары туттардылар. «Саха Өрөспүүбүлүкэтин тырааныспарын бочуоттаах үлэһитэ» түөскэ кэтиллэр үрдүк бэлиэнэн Анисим Яковлев наҕараадаланна. Кинигэ ис хоһоонун, суолтатын туһунан сиһилии Нина Колосова ырытта. Салгыы үлэлээбит-хамсаабыт салайааччылар, бэтэрээн тырахтарыыстар тыл этэн, ахтыылары оҥорон, бэйэлэрин эҕэрдэлэрин, баҕа санааларын тиэртилэр. Мэҥэ Хаҥалас улууһун дьаһалтатын пресс-сулууспата