Тыа сиригэр ыччаты олохсутуу, усулуобуйаны тэрийии бэлиитикэтэ өрөспүүбүлүкэ үрдүнэн сы...
Тыа сиригэр ыччаты олохсутуу, усулуобуйаны тэрийии бэлиитикэтэ өрөспүүбүлүкэ үрдүнэн сытыытык, киэҥ далааһыннаахтык бара турар. Бу бэлиитикэни өйөөн, улууспут салалтата уонна улуустааҕы тыа хаһаайыстыбатын управлениета быйылгы сылга икки эдэр фермердэргэ: Алгыс Руфовка уонна Александр Потаповка улахан өйөбүлү оҥордулар. Бэлиэтээн эттэххэ, тыа хаһаайыстыбатын управлениетын салайааччыта Семен Семенович Васильев уонна исписэлиистэр уолаттары улаханнык өйөөн, "Кыра кыамталаах хотоннору тутуу, саҥардыы" бырагыраамаҕа кыттан хапсан, субсидия ылалларыгар дьоһуннаах олугу уурдулар.Бу көрүллүбүт үбүнэн 50 төбө сүөһүгэ анаммыт хотоннор үлэҕэ киирдилэр. Күн бүгүн хотоннору салгылатар вентиляционнай тиһик бэркэ үлэлии турар. Сүөһүлэр кыстыкка үчүгэй туруктаах киирбиттэр, билигин хаачыстыбалаах отунан хааччыллан аһыы тураллар. Саҥа хотоҥҥо киирэн сүөһүлэр хайыы - үйэ дьиэтийбиттэр. Эдэр ыччат тыа сиригэр олохсуйарыгар, өбүгэ төрүт дьарыга утум быһыытынан салҕанан бара турарыгар бу дьоһуннаах өйөбүл, чопчу хардыы буолбатах дуо? Ама, бу кэннэ хас биирдии саха ыччатыгар тыа сиригэр олохсуйан хаһаайыстыба тэринэр, олохтоох аһы- үөлү дэлэтэр санаа үөскүө, күүһүрүө суоҕа дуо? Өскөтүн Эн тыа хаһаайыстыбатынан дьарыктаныаххын, тугу эмит саҕалыаххын баҕарар буоллаххына, улуустааҕы тыа хаһаайыстыбатын управлениетыгар эбэтэр нэһилиэгиҥ исписэлииһигэр кэлэн сүбэлэһэргэр ыҥырабыт! Тыа хаһаайыстыбатын управлениетын пресс- киинэ