Нэһилиэк хуора ньиргийдэ, нарын үҥкүү абылаата. — 5 мая 2026 г. в 00:58:30.125
Нэһилиэк хуора ньиргийдэ, нарын үҥкүү абылаата. Муус устар 29 күнүгэр Өктөмҥө саха бастакы композитора А.В.Скрябин 130 сылыгар аналлаах улуустааҕы хуор көрүүтүн бэстибээлэ уонна Аан дойдутааҕы үҥкүү күнүгэр аналлаах үгэс буолбут “Алыптаах үҥкүү” улахан кэнсиэрэ буолан ааста. Бу киэһэ улуустан бэстибээли көрөр дьүүллүүр сүбэ кэлэн нэһилиэк уопсай хуорун икки ырыатын сыаналаатылар. Хуорга барыта 75 кыттааччы, ол иһигэр 23 эр киһи нэһилиэк гимнын уонна Эллэй тылларыгар, Виктор Никаноров дьүрүлүгэр «Айхал-айар үлэҕэ» ырыалары ньиргиччи, олус үрдүк таһымҥа ыллаабытын, дьон бары биир тыыҥҥа киирэн, биир сутурук буолан, бары бииргэ – түмсүүгэ баҕалаахтара, кыахтаахтара көһүннэ диэн дьүүллүүр сүбэ бэлиэтээтэ. Хуор толоруутугар даҕатан үгэс буолбут тэрээһиммит «Алыптаах үҥкүү» кэнсиэрэ Аан дойдутааҕы үҥкүү күнүгэр ананан ыытыллан дьон-сэргэ биһирэбилин ылыан ылла. Бастакы түһүмэҕинэн Өктөмнөөҕү тыйаатыр оскуолатын үҥкүү, тыйаатыр салааларын иитиллээччилэрин талааннарын сөҕө көрдүбүт. Дириэктэр Александра Ивановна тэрийиитинэн, режиссер, үҥкүү туруорааччы Аюна Игоревна туруоруутунан остуоруйа хаамыыта олус сэргэхтик, бииртэн биир талааннаах оҕолору арыйда, дьон болҕомтотун тарта. П.И.Шадрин аатынан Өктөм орто оскуолатын «Күн күлүмүрэ» үҥкүү бөлөҕө сомоҕолоһуу сылыгар аналлаах араас омук үҥкүүлэрин туруоран дохсун ытыс тыаһынан арыалланнылар. АГАТУ Өктөмнөөҕү салаатын устудьуоннара эбээннии үҥкүүлэрэ олус табылынна. Онон, бу киэһэ дьон-сэргэ тоҕуоруһа мустан хуор эрчимнээх ырыатыгар киирэн патриотическай тыыммыт уһугунна. Ол кэнниттэн аны алыптаах үҥкүүлэргэ уйдаран кэрэҕэ, сырдыкка тардыһан, оҕолорбутунан, нэһилиэк дьонунан киэн туттуу барыбыт дууһатын таарыйда. Федора Фомина